Марий Элысе Молодёжный парламентын тарватымыж почеш, 8 апрельыште МарГУ-н пединститутшын спортзалыштыже «Доверяй, играя» всероссийский проектын кышкарыштыже «Марий машиностроитель завод» АО-н Пашам ыштыше молодёжьшо, Молодёжный парламентын еҥже да Кугыжаныш Погын аппаратын депутатше ден пашаеҥже-шамыч коклаште волейбол дене йолташле матч-влак эртеныт.
Палемдыме проектым Волонтёр рӱдер-влакын ассоциацийышт ден Россий Федерацийын Мер палатыже илышыш пуртат. Тӱҥ шонымаш кугыжаныш кучем органын элысе добровольческий сообществе-влак дене «ик паша шӱлышыштӧ» формально огыл мутланымыж дене кылдалтын. Команде-влак дене ушнымо спорт модыш кучемын представительже ден республикын чолга еҥже-шамычым иквереш уша.
Турнирыште икымше верым «Марий машиностроитель завод» АО-н Пашам ыштыше молодёжьшо сеҥен налын, кокымшо верыш Кугыжаныш Погын аппаратын депутатше ден пашаеҥже-шамыч лектыныт, кумшыш – Молодёжный парламентын еҥже-влак.
Сеҥыше команде ден призёр-влакым «Единый Россий» партий шке призше дене палемден.
– Тачысе мероприятийыште Марий Элын чолга молодёжьшылан кугыжаныш кучем орган-влакын еҥышт дене палыме лияш да ончыкылыклан пеҥгыде кылым ышташ сай йӧн лийын. Команде дене ушнымо спорт модмаш кучемын представительже ден чолга еҥ-шамычым иквереш уша да модмашым эртарыме годым сай ассоциацийым ышта манын ӱшанем» – палемден «Единый Россий» партийын Йошкар-Оласе пӧлкажын секретарьже Антон Волков.
М.ИВАНОВА
Фотом интернет гыч налме
