Эл вуйлатышын пашажым жаплан шуктышо Юрий Зайцев граждан-влаклан приёмым эртарен.
Курыкмарий район Нермычаш ял гыч Светлана Сивандаева Шимйӓр-Аксай корным кунам олмыктен шуктымо нерген йодышым пуэн. Республикын Транспорт да корно озанлык министрже Александр Герасименкон мутшо почеш корным «Ялысе кумдыкым комплексно вияҥдымаш» программе почеш тӧрлаш ямдылалтыт. «Тендан телефон номерда мый денем уло, ида тургыжлане, пашам тӱҥалмек, йыҥгыртена», – вашештен Юрий Зайцев.
Медведево район Сидорово ялыш корным 1989 ийыштак шарыме да ик ганат олмыктымо огыл. Тидын нерген Алексей Нестеров ойлен. Корным август мучаш марте тӧрлаш шуктышаш улыт.
Йошкар-Оласе 10-шо номеран школын ача-ава комитетшын председательже Елена Воронцова олан администрацийжылан школ стадионым олмыктымылан тауштен да школышто окна-влакым вашталташ полшаш йодын. Йошкар-Олан мэрже Евгений Маслов палемден: 30 окна блокым вашталтат, ты пашалан ола казна гыч 1,2 млн теҥге ойыралтеш.
Медведево районысо Таир посёлкышто илыше-влак 2015 ий гычак газ пучым шупшмым вучат, ямдылалтме пашам шке вийышт дене шуктеныт. Но газификаций ий гыч ийыш кусаралтеш. Тидын нерген йодышым «Таир-Газ» кооперативын председательже Владимир Сергеев тарватен. Марий Элын промышленность, экономикн вияҥмаш да торговльо министр Станислав Крылов тыгай вашмутым пуэн: Таир посёлкыш газопроводым «Газпром» ПАО-н средстваже кӱшеш чоҥаш тӱҥалыт, еҥ-влакын суртышкышт газ 2023 ийыште толын шушаш. «Мый тиде проблеме нерген колынам. Газпром дене иктаж умылыдымаш лектеш гын, вигак мыланем увертарыза. Проект да смете документаций ямде, экспертизе уло гын, подрядчик кунам пашам тӱҥалмыжым рашемдыза», – каласен Юрий Зайцев министрлан.
Л.СЕМЕНОВА
Д.Речкинын фотожо
