Марий Эл вуйлатыше Юрий Зайцевын «Марий кеҥеж» проектше кышкарыште эртыше мероприятий-шамыч Йошкар-Олаште илыше-влакым ынде кумшо ий почела куандарат.
Тений фестиваль жапыште Еш идалыклан пӧлеклалтше мероприятийлаш ятыр еҥ-влак чумыргат. Теве кодшо кугарнян, 26 июльышто, рӱдоласе Суворов уремысе 40-ше пӧртын кудывечыштыже эртыше еш пайрем моткоч весела лийын. Тиде мероприятийыш йоча да нунын ача-авашт, коча-коваштат кумылын ушненыт. Нуно весела сем почеш куштеныт, тыгак тӱрлӧ мастер-классыште усталыкыштым ончыктеныт, а «Три кота» мультфильмын геройжо-влак Коржик ден Карамелька шовын шӱвыроҥ шоум ончыктеныт.
– «Марий кеҥеж» фестивальыште эре весела кумыл шижалтеш. Поснак кудывечылаште эртыше мероприятийлаште пошкудо-шамыч ик еш семын шижыт. Молан манаш гын кеч-могай йодышым тӱшкан решатлаш куштылгырак, – каласен «Йошкар-Ола» ола округын Депутат-влак погынын депутатше Д.Лабутин Суворов уремысе кудывечыште эртыше пайрем годым. Тидымак пеҥгыдемден «Йошкар-Ола» ола округын Депутат-влак погынын депутатше В.Перерезов.
Л.ШАБДАРОВА
А.Наумован фотожо
