НОВОСТИ ПАТЫРЛЫК Сеҥымаш Чолгалык

Фронтысо пий

Фронтысо пий
Таче элыштына фронтовой пийын Кечыжым палемдат. Тидын дене келшышын Москосо Сеҥымаш тоштер онлайн-программыш ӱжеш. Тыгайже ынде кудымшо гана эртаралтеш.
19 августышто интернет дене виртуальный экскурсийыш, мастер-классыш ушнаш йӧн пуалтеш. Тудо Кугу Отечественный сарыште служитлыше пий-влакын подвигыштлан пӧлеклалтеш. Тыгак ты теме дене кылдалтше кином ончыктат.
Онлайн-программым музейын сайтыштыже (https://victorymuseum.ru/) ончаш лиеш.
«Историйын кечыже» программе годам виртуально пурышо-шамыч ты пайремын историйже, армейский Дина лӱман пий-диверсант дене палыме лийыт. Гид ныл йолан йолташнан икымше боевой подвигышт дене палдара. Легедзино села воктене 500 пограничник 150 служебный пий дене тушман ваштареш кучедалмышт нергенат палаш оҥай лиеш.
Ныл йолан йолташнан ӱшанле, патыр, аралтыш улмыжым чылан палена. Кугу Отечественный сарыште пий-связист, санитар, сапёр, диверсант, почтальон, кычкыме пий-влак лийыныт. Сӧй пасу гыч чылаже 700 утла сусыргышо салтакым луктыныт, 4 миллион мине ден фугасым муыныт да палемдыме верыш 200 тӱжем докуменым конден шуктеныт, – палемденыт организатор-шамыч.
Ты датым 2017 ийыште Сеҥымаш музейын тӱҥалмыж дене палемдат. Лач ты кечын, 1943 ий 19 августышто, Дина лӱман фронтовой овчарке-подрывник тушманын кӱртньыгорным пудештарен, но шкеже колен огыл. Ончычат нылйолан полышкалышына-влак пудештарылыныт, но тыгодым шкештат ӱмыр лугыч лийыныт. А Дина немыч паровоз ончыко, рельсыш, кудал лектынат вачыштыже келыштаралтше миным шуэн, пӱйжӧ дене предохранительный чекым шупшылын да верже гыч тӧрштен кораҥын. Ты кечын фронтовой сводкышто теве мом увертареныт: «1943 ий 19 августышто Полоцк Дрисса перегонышто тушманын эшелонжым пудештарыме. Лу вагоным пытарыме, кӱртньыгорнын кугу кутышыжо йӧрдымыш лектын. Мемнан велым йомдарымаш уке».

Марий Элыште фронтовой пийын Кечыжлан пӧлеклалтше мероприятийым «Россий ДОСААФ-ын Региональный пӧлкажын служебный пийым туныктымо рӱдерже» профессиональный образовательный учрежденийже ден Россий ДОСААФ-ын Региональный пӧлкаже эртарат.
Пайремым 20 августышто 10 шагатлан (Йошкар-Ола, Красноармейский слобода, 31) торжественно почыт.
Мероприятий кундемыштына кинологический спортым вияҥдыме амал дене кылдалтын.

Опубликовать в Одноклассники

Добавить комментарий