Марий Эл вуйлатыше Юрий Зайцев Финн-угор калык-влакын III всероссийский форумлан ямдылалтме да эртарыме шотышто оргкомитетым чумырен.
Форум регион-влакын этнотӱвыра могырым вияҥме йодышлан пӧлеклалтше ик эн кугу площадке лиеш. Тудо кажне кок ийыште эрта. Тылеч ончыч Ижевскыште да Саранскыште лийын. Тений 9-12 сентябрьыште Йошкар-Олаште эрта.
Российысе Финн-угор калык-влакын ассоциацийыштым вуйлатыше Пётр Тултаев выступленийыштыже ик регионышто иканаште кок мероприятийын, Финн-угор калык-влакын всероссийский форумышт ден Российысе Финн-угор калык-влакын ассоциацийыштын погыныштын, эрташ тӱҥалмыштым палемден. Марий Элыш элнан 40 регионжо гыч представитель-влак чумыргат.
Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов мероприятий-влакым эртарыме план дене палдарен.
Марий Эл вуйлатышын пресс-службыжын уверже негызеш Лидия Шабдарова ямдылен.
Денис Речкинын фотожо/ Марий Эл вуйлатышын пресс-службыжо.
