2024 ийым Российыште Ешын идалыкшылан увертарыме. Эше пел ий веле эртен гынат, куд тылзе жапыште гына республикыште да районлаште могай-гына мероприятий-влак эртаралтын, еш-влаклан могай-гына конкурс-влак темлалтын, ойыртемалтше еш-влакым кушто да кузе гына чапландарен, палемден огытыл?!
Тидым шотыш налын, таче ме икмыняр еҥлан тыгай йодыш-влакым пуышна: те тений Еш идалык эртаралтмым шижыда мо? Тудым ешда дене кузе эртареда? Мом ойыртемалтшым ыштеда? Ала иктаж мероприятийыш ушненда? Але, ты ийым кужу жаплан шарнен кодаш манын, иктаж-кушко ешда дене пырля миен толында?
Эдуард Иманаев, Марий савыктыш пӧртын директоржо:
– Юмылан тау, мыят, пелашемат ешын кӱлешлыкшым умылен кушшо улына. Мужыр дене илымым, йоча-влакым куштен, ӱмыргорным шуйымым илышын негызшылан шотлена. Тиде шижмашым ача-авана-влак мыланна шыҥдарен моштеныт, кугезе тукым кыл тидымак ушештара.
Чаманаш логалеш, чыланак тыге огыл. Поснак кызыт илышын ЧЫНжым вес семын умылаш тӧчышӧ-влак лектыныт, шкеныштым пӱрымашын озажлан шотлат – Юмет утарыже. Нунылан еш илыш – ала-могай нелылык, сандене пиалым, куаным вес вере кычалыт. Тыгай лугалтмаш тетла ынже лий манынак, очыни, а кӧ «лугалтын» гын, илышын рӱдыжым умылыжо манын, Еш идалыкым увертарыме. Тидлан куанена, тек ӱмыргорнышто айдеме тукым «илыш книгаште» каласыме семынак мужырлалтын, шукемын, уш-акыл дене пойдаралт-пеҥгыдем ила.
Еш идалыклан увертарыме ийым ме посна ойыртемалтшын эртараш огына тырше, а мыланна еш перкем шижын илаш кажне кечыже шерге. Тенийсе ий мемнан ешлан тугакшат ойыртемалтше – Ший сӱаным палемденна. 25 ий ончычсо семынак пеледыш аршаш, пайрем кочкыш, пӧлек дене икте-весынам куандаренна. Лишыл еҥна, родына-влак мемнан пиал шижмашнам пайлаш полшеныт.
Светлана Шуталева, Марий Турек район гыч шуко шочшан ава:
– Тений ме еш дене кылдалтше Россий кӱкшытан икмыняр конкурсыш ушненна. Мутлан, «Это у нас семейное» конкурсын участникше лийынна да 29 май гыч 2 июнь марте Уфашке миенна. Тушто Юл кундем федеральный округышто ты конкурсын полуфиналышкыже лекше-влакым чумыреныт ыле. Марий Эл гыч тушто 12 еш лийынна. Ты конкурсышто ешнан кум роликшым палемденыт да тидлан тӱрлӧ пӧлекым: телевизорым, смарт-шагатым, спортивный сумкам, икмыняр молым – кучыктеныт.
«Всей семьёй» проектышкат ушненна да темлыме кажне заданийым шуктенна. Тидлан тушечат ятыр пӧлекым колтеныт, республик кӱкшытыштат палемденыт.
Иктешлыме семын ойлаш гын, тенийысе идалык конкурс ден проектлашке ушнымо, мероприятийлашке мийыме дене кужу жаплан ушеш кодеш. Тиде мемнан ешлан, чынжымак, еш идалык лийын. Тӱрлӧ заданийым иквереш шуктымо ешнам эшеат лишемдаш да пеҥгыдыракым ышташ полшен.
Александр Степанов, «Энсай» салонын вуйлатышыже:
– Тений элыштынат, республикыштынат Еш идалык эртаралтмым чынже денак шижына. Тидыже кузе палдырна? Мемнан деке салоныш еҥ-влак толыт да уло ешыштлан марий тӱран вургемым ямдылен пуаш йодыт. Тений тыгай кумылан еҥ-влакын чотышт поснак ешпаралтме палдырна. Тидыже куандара, вет тугеже нуно еш дене кылдалтше мероприятийлашке ушнаш ямдылалтыт, лектеш. Санденак шкеже еш дене эше нигушкат миен огынал – кызытеш ярсен огынал.
Любовь Камалетдинова
И.Речкин ден еш альбом гыч налме фото-влак
