Марий Элыште тулык икшыве-влаклан илыме верым ойыраш 2024 ийыште 572 миллион теҥгем колташ палемдалтеш
Марий Эл вуйлатыше Юрий Зайцевын вуйлатымыж почеш республикысе правительствын заседанийже лийын. Тушто регионлан социально-кӱлешан икмыняр йодышым каҥашеныт.
Тӱҥалтыште республик вуйлатыше Россий Федерацийын Вооруженный вийжын Генеральный штабшын начальникше – Россий Федерацийын обороно министржын икымше алмаштышыже Валерий Герасимовын грамотшым Марий Эл правительстве председательын алмаштышыже Степан Воронцовлан кучыктен.
Пеҥгыде вашкыллан, СВО кайыме кундемыште задачым шуктышашлан полышым пуымылан Марий Эл вуйлатышылан 34497 войсковой частьын командиржын тауштымашан серышыжым пуэныт.
Тиде заседанийыштак «Оласе кумдыкым йӧнаным ыштымаш» проект дене келшышын 2025 ийыште тӱзатышаш вер-влакым ойырен налме шотышто иктешлымаш дене палдареныт. Йӱклымашке 52 тӱжем утла еҥ ушнен. Шушаш ийыште тӱшкан пайдаланыме 8 кумдыкым шотыш кондат.
Марий Элысе ЦУР вуйлатыше Лея Леманнын палдарымыж почеш, тиде рӱдерыш еҥ-влак ик эн шукыжо кумдыкым тӱзатыме, шӱкшакым жапыштыже огыл наҥгайыме, тазалыкым аралыме, поснак врач-влак деке возалтме шотышто, йодыш-влакым колтеныт.
Паша да социально аралымаш министрын алмаштышыже Галина Ярцеван ойлымыж почеш, Марий Элыште тулык икшыве-влаклан илыме верым налаш тений 572 млн. теҥге ойыралтеш. Тидыже ӱмашсе деч 35 %-лан шукырак. Ты кугыт окса 260 тулык икшывылан илыме верым ойыраш йӧным ышта.
«Марий Элыште сакыр диабет дене кучедалмаш» региональный программе илышыш кузе пурталтме нерген тазалыкым аралыме министрын алмаштышыже Татьяна Бастракова каласкален. Тудын мутшо почеш, пытартыш 5 ий жапыште республикыште илыше-влак коклаште тыгай черан-влакын чотышт 26,6 % -лан ешаралтын. Тидыже еҥ-шамыч кокла гыч южыштын келшен толдымын илымышт дене кылдалтын. Сакыр диабет профилактике осмотрым да диспансеризацийым эртарыме годым палдырнен.
Чер улмым пален налаш да пациент-влакын состоянийыштым тергаш федеральный бюджет гыч 9,7 млн. утла теҥгем ешарен колтеныт. Сакыр диабет черан-влаклан медицине полышым пуаш регионысо бюджет гычат пытартыш 5 ий жапыште оксам ойырымо кугыт 4,2 пачаш шукемын. Марий Эл вуйлатышын кӱштымыж почеш республикысе Тазалыкым аралыме министерствылан 10 млн. теҥгем ешарен колтымо.
Марий Элын внутренний политике, верысе самоуправленийым вияҥдымаш да юстиций министрже Антон Мирбадалев палдарен: 2024 ийыште Килемар муниципал район Килемар муниципал округыш савырна. Тидын нерген пунчалым публичный колыштмаште луктыныт да верысе депутат-влак тудым сайлан шотленыт.
Марий Эл вуйлатышын пресс-службыжын уверже негызеш Л.Камалетдинова ямдылен
