Волгалтарыш
Ешартыш оксам ойырымо
«Илышлан кӱлешан инфраструктур» нацпроект почеш илем тураште корно умбакыже волгалтаралтеш.
Тений регионал кӱлешлыкан корнылаште 14 километр утла кужытышто электролампан линийым шупшмо.
Аварийым шагалемдышашлан да йолешке ден водитель-влаклан волгыдым ыштышашлан республикын корно озанлык да транспорт министерствыже регионал бюджет гыч тидлан ешартыш средствам ойырымо нерген пунчалам луктын. Ты окса дене чумыржо 4 километр утла кужытан эше вич участкыште волгалтарышым ышташ лиеш.
Ик тыгай объект Кокшайск – Красногорский регионал трассыште Шемшӱргӧ ден Ялпай ялла тураште чарналтыш воктене верлана. Тушто специалист-влак 400 метр кужытышто волгалтарыше линийым шупшыт, тротуарым ыштат, чарналтыш тура йолешкылан светофоран вончымо вер лиеш.
Тыгай пашам шуктымаш йолешке коштмо да транспорт кудалыштме верлам пычкемыште волгалтараш да азап лиймым шагалемдаш полша.
Юрий ИСАКОВ.
Снимкыште: корно волгалтаралтеш.
Фотом «Марийскавтодор» ГКУ деч налме.
