«Эреак латиндеше…»
15 апрельыште Волжск олаште (рӱдӧ стадионышто) воин-интернационалист, «Йошкар Шӱдыр» орден дене (колымекыже) палемдалтше Игорь Шестаковым (1967-1986) шарныме лӱмеш куштылго атлетике дене таҥасымаш эртаралтеш.
Старт 10 шагатлан пуалтеш. Ийготым шотыш налын, 800, 1500, 3000, 5000 метр кутышым куржын эртат. Тыгак ССУЗ, военно-патриотический клуб-влак коклаште смешанный эстафете эрта (4х200 м.).
Палаш:
Игорь Шестаков 1967 ий 30 апрельыште Волжск олаште шочын, 2-шо №-ан школышто тунемын. Рвезыж годым технический творчествылан кумылаҥын, тӱрлӧ спорт мероприятийыште, таҥасымаште вийжым терген. Лӱйкалымаш дене призёр радамыште лийын, а латкуд ияш гыч самбо дене пеҥгыде кылым кучен. Тыгак мотоцикл дене кудалыштын.
1986 ий 8 ноябрьыште Совет Армийыш налыныт. Тудо юж десант войскаш логалын. Учебкым Ашхабадыште эртен. Игорь куанен канде беретым чиен. Варажым тудо Афганистаныште, разведбатальонышто служитлен. Тыге боевой илыш тӱҥалын: курыклаште рейд, душман-шамычын йолгорнылаштыже засаде, блок-постлаште дежурство… 1 декабрьыште черетан боевой заданийым шуктымыж годым нелын сусырген да 7 декабрьыште ӱмыр лугыч лийын. Патырлыкым да геройлыкым ончыктымыжлан колымыж деч вара «Йошкар шӱдыр» орден дене наградитленыт. Мотострелковый ротым лӱйкалыше тушманым чарен шогалтен, автомат дене кум огневой точкым пытарен. 1989 ий 12 апрельыште Волжскысо ик уремлан тудын лӱмжым пуэныт, 2-шо №ан школ пырдыжеш мемориал оҥам келыштареныт.
Е.Эшкинина.
