Республикнан рӱдолаштыже 12 гыч 20 июль марте эртаралтше Инвалид-влакын III всероссийский кеҥеж спартакиадышт марте икмыняр кече веле кодын! Шижынат огына шукто – тидыжат вашке эртен кая.
Тиде кугу событий вашеш республикын министерствылаштыже тӱрлӧ паша ышталтеш. Теве, мутлан, 3 июльышто Молодёжный политике, спорт да туризм министерстве спартакиадын участникше-влаклан Йошкар-Ола мучко коштын савырнаш экскурсий маршрутым ямдылен тудын дене палдарен. Тушко Йошкар-Ола историй тоштержын, олан турист да увер рӱдержын пашаеҥже-влак, тыгак экскурсовод-шамыч да молат погыненыт.
А.Байкова
