Тыгай лӱм дене эртаралтеш 26 апрельыште – Марий талешке кечын М.Шкетан лӱмеш Марий драме театрыште В.Колумбым шарныме кас.
– Валентин Колумб – уста марий поэт. Тидым чылан сайын палат. А теве тудын мутшылан муро-влак шотышто тыге каласаш ок лий, векат. Тиде чырым кораҥдаш манме шонымаш денак чумырышна «Эре чоҥешташ, чоҥешташ» сылнымут-сылнысем программым, – рашемда театрын художественный вуйлатышыже В.Пектеев. – Тӱҥалтыште ме поэтын илыш да усталык корныж дене палдарена. А тӱҥ программыште чылаже латкум муро йоҥгаш тӱҥалеш. Тыгак артист-влак поэтын почеламутшо-влакым сцене гыч сылнын лудыт.
В.Колумбын мутшылан эше илымыж годымак композитор Эрик Сапаев, Ион Кузьмин, Дмитрий Кульшетов мурым возеныт. А эн шукыжо тидым Вениамин Захаров ыштен. Тудын возымо да Иван Смирновын мурымо ик «Тальянкыжак» мом шога!
Тиде концертыште артист Иван Соловьев икмыняр мурым мура. А поэтын ик почеламутшылан шкеак семым келыштарен, да тудо ты кастене икымше гана йоҥгалтеш.
– Валентин Колумбын почеламутшым шуко лудынам, — манеш Иван.- Тидым ынде май мучаште лекшаш «Колумб» спектакльым ямдылымылан кӧрат ышташ логалеш. Нуно тыглай огытыл. Южыжым иканаште умылен шукташат ок лий, кок-кум гана лудмеке веле тылат авторын шонымашыже почылтеш. Колумбын йылмыже пешак образный, метафорлан, таҥастарымашлан поян. Теве «Мӧҥгыштӧ» почеламут корнылажымак ончалаш гын, тиде раш коеш:
Куклем гыч толеш ночко ломыж там,
Мардеж покта веле мӧҥгем.
Шопке мыйын толмо корнышко
Чокан оптен шӧртньӧ теҥгем.
Тиде почеламутым мый «Давай на равных говорить» сылнымут каслан ямдылышым. Да тудым чонем дене шижым, авторым умылышым. Тыге муро сем шочо.
Марий Талешке кечын талешке радымыш пуртымо уста, кугу кӧргӧ вий-куатан патыр айдемым – Валентин Колумбым – айста пырля шарналтена да тудлан вуйым савена. Тендам театрыште уло кумылын вучена.
Светлана БЕЛКОВА, сылнымут пӧлкам вуйлатыше.
