Республикысе калык усталык да тӱвыра ден каныме паша шотышто шанче-методике рӱдер пелен икмыняр усталык коллектив пашам ышта. Тушто йочасадыш коштшо икшыве да кугурак ийготан-влак мастарлыкым шуарат. Кажне коллектив сылне сем, муро, куштымашыж гоч марий калыкнан поян тӱвыражым, ойыртемалтше йӱлажым почын пуаш тырша. А кодшо шыжым рӱдер пелен эше ик ансамбль чумырген. Тудым «Тулпеледыш» манын лӱмденыт.
Ты коллективым кӧ вуйлата? Репертуарже могайрак? Нине да моло нерген пален налаш манын, ансамбльын репетицийжым ончаш лӱмынак мийышым. А тудыжо Калык культур-влакын пӧртыштышт эрта.
Палыме муро почеш
Куд шагат кас. Усталык шӱлышан пӧртын кокымшо пачашышкыже кӱзен шумеке, сылне сем, муро йӱк, рвезе-влакын тывырдыкышт торашке шергылтыт. Кугу залыште «Онар» ансамбльын участникше-шамыч марий куштымашым тунемыт, а вес пӧлемыште нунын ача-авашт гармонь сем почеш ныжыл мурым мурат:
«Лывыла лум йога, пӧрдын-модын,
Шарныкталын кеҥежым мылам.
Лек уремыш, таҥем,
Лек уремыш, таҥем,
Ынже ойыро йӱштӧ мемнам…»
Изиэм годсекак моткоч палыме, тудым эртыше курымын 90-ше ийлаштыже марий телевиденийын передачылаштыже чӱчкыдынак йоҥгалтарат ыле.
– Тиде муро мыланнат пеш лишыл, тудо мемнам ик верыш ушен, – репетиций кайыме пӧлемыш пурымеке, гармоньжым шоктымым чарнен, мутланымашым тӱҥале коллектив вуйлатыше Борис Дмитриев. – Садлан ансамбльнан репертуарышкыже ик эн ончыч пурен.
Шонымаш ондакак лийын
Калык усталык рӱдер пелен 2017 ийыште «Эрвел марий» ансамбльын спутникше семын изи йоча-влакым «Онар» ансамбльыш чумыреныт. Кушкын толшо тукымым изинекак калыкнан тӱвыра поянлыкше, эртен толмо корныж дене палдараш кӱлмӧ шонымаш рӱдер вуйлатыше, балетмейстер, Россий да Марий Эл тӱвыран сулло пашаеҥже Тамара Викторовна Дмитриеван лийын. Куд ий жапыште ты коллектив калыклан палыме лийын шуктен.
– «Онарыш» марий икшыве-влак дене руш, татар-влакат кумылын ушненыт. Ача-ава-влак йочаштым репетицийыш кондымеке, коридорышто вучен шинченыт. Шагат утла жапым пайдалын эртарышт манын, Тамара Викторовна нуным ансамбльыш але тӱрлаш туныкташ чумыраш шонен пыштен, эсогыл мастар еҥымат муын ыле. Но пандемий жапыште тиде шонымаш изиш ӧрдыжкӧ шӱкалалтын, адакшым варажым Тамара Викторовнат ош тӱня дене чеверласыш… – куштылго огыл жапым ойганрак шарналтыш Борис Андреевич да мутланымашыжым умбакыже шуйыш. – Пандемий эртымеке, йоча-влакым репетицийыш погымеке, ача-ава кокла гыч ала-кӧжӧ ансамбльым чумыраш темлен…
! МАТЕРИАЛЫМ ТИЧМАШНЕК «МАРИЙ ЭЛ» ГАЗЕТЫШТЕ ЛУДАШ ТЕМЛЕНА!
А.БАЙКОВА
Фотом ансамбльын альбомжо гыч налме
