Теҥгече эрдене 8 шагатат 10 минутлан Йошкар-Олашке Йӱштӧ Кугыза тольо! Да иктаж-мо дене огыл, а шкенжын поездше дене!
Российын эн тӱҥ Йӱштӧ Кочайжым ужаш шонышо-влак рӱдоласе кӱртньыгорно вокзалыш ятыр ончычак погынаш тӱҥалыныт ыле. Утларакше, мутат уке, йоча-шамыч ача-авашт дене пырля толыныт.
Теве палемдыме жапыште вокзалын пурла велныже поезд, толмыж нерген шижтарен, йӱкым пуыш. Тидым колын, перроныш чумыргышо-влак туге йывыртен кычкыраш, совым кыраш, кидым рӱзаш тӱҥальыч – пуйто эн кугу унаштым вучен шуктеныт! Такшым тыгак, тудо моткочак вучымо лийын, вет але марте мемнан деке шке илыме верже гычак, Великий Устюг гыч, Йӱштӧ Кугыза нигунамат толын огыл! Санденак тыгайым ужде кӧ чытен кертын?! Кӧн йӧнжӧ лийын гын, игечын пуйто лӱмын гаяк тынар чот йӱштӧ улмыжым шотыш налде, чыланат ты эрдене вокзалыш вашкеныт докан!
Йӱкым пуымеке, поезд койылалтыш. Тудо ончылныжат, пурла велымжат тӱжем наре лампычке дене волгалтын да тунар моторын койын! Тушто возымо: «Передвижная резиденция Деда Мороза». А составше могай кужу! Поезд толеш, толеш – пуйто мучашыже нигунамат огеш лий, шонет! Чыным ойлаш гын, тудо тыгай кужу лиеш манын, йӧршынат вучымо огыл. 19 вагон чарналтен шогале!
Йӱштӧ Кугыза ден Лумӱдырым мемнан олашке толмышт дене эн ончычак Йошкар-Олан мэрже Евгений Маслов саламлыш да пӧлекым кучыктыш. Тыгодым рӱдолаште тыгай кугу событий лиймылан шкенжынат моткочак йывыртымыже шижалте!
Умбакыже мо кузе лийме нерген шушаш кугарня номерыште радамлынрак каласкалена.
Любовь Камалетдинова
М.Скобелевын фотожо
