Бауман лицей пеленысе «Лира» искусство школын «Узоры» йоча образцовый ансамбльжын участникше-влак «Алтын-Майдан» интернационал фестивальыште 1-ше степенян лауреат лийыныт.
Тидын деч посна «Вокал» номинацийыште «Первые из лучших» специальный приз дене палемдалтыныт.
Абхазийын Сухуми олаштыже эртыше фестивальыште Марий Элын чапшым кӱшнӧ кучышо коллектив конкурслаште, тӱвыра мероприятийлаште (этнокасыште, экскурсийыште, мастер-классыште да моло вере) лийын. Тидын деч посна йоча-влак воин частьыште специальный военный операцийын участникше-шамычлан концертым ончыктеныт.
Йоча коллективым вуйлатыше-влакын мутышт почеш, тыгай фестиваль – муро да куштымаш гына огыл, тиде самырык тукымым калык тӱвыралан да шочмо эллан шӱмаҥдымаш».
Г.Кожевникова
Фотом «Лира» йоча искусство школын архивше гыч налме
