26 майыште Йошкар-Олаште, Я.Эшпай лӱмеш Марий кугыжаныш филармонийыште, «Успешная семья Приволжья» окружной конкурсын республиканский этапше лие.
Юл кундем федеральный округышто тудо 2013 ий годсек эртаралтеш. Конкурсыш кажне ийын ПФО-н чыла регионжо гыч ийготыш шудымо кум да утларак йочам ончен куштышо, тыгак икшыве-влакым ашнаш налше 14 еш ушна.
Ешын тӱнямбал кечыже 15 майыштак палемдалтын гынат, тиде гана конкурс лач тудлан пӧлеклалтын ыле. Тушто ныл еш сеҥышыш лекшаш верч ныл конкурсышто усталыкше ден мастарлыкшым ончыктыш.
Икымше конкурс «Ешын презентацийже» ыле. Йошкар-Ола гыч индеш шочшан (5 – ашнаш налме) Соловьевмыт еш шкешт дене видеофильм гоч палдарыш. Килемар район Нежнур села гыч 25 икшывым (тышеч нылытше веле шкеныштын) ончен куштышо Кропиновмыт еш шкешт нерген почеламут дене каласкалыш, тыгодым экраныште видеоролик ончыкталте. А вара еш нерген мурым пырля муралтышт. Марий Турек район 8 йочан (5 – шкеныштын) Скулкинмыт-Орловмыт еш шкешт дене почеламут, муро да видеоролик полшымо дене палдарыш. Юрино район гыч кум йочам ашнаш налше Александровмыт-Анисимовмыт еш, чынрак каласаш гын, нине икшыве-шамыч почеламутым ойлышт.
Кокымшо творческий конкурс ыле. Соловьевмыт ешыште чылан гаяк усталык шӱлышан улыт да шукынжо тӱрлӧ семӱзгар дене шоктен моштат. Сандене нуно тыгак ыштышт: синтезаторым, гитарым, скрипкам, шиялтышым шоктен, чылан пырля мурым мурышт. Кропиновмытын гын авашт гына шкетын мурым йоҥгалтарыш. Скулкинмыт марий мурым мурышт, марла кушталтышт. Александровмытын уэш йоча-шамычак кумытын мурым йоҥгалтарышт.
Кумшылан культурно-познавательный конкурс лие. Тушто еш-влаклан экраныште возалтше 10 йодышлан вашмутым кагазыш возен пуаш кӱлын. Вараже кӧн кузе вашештымыштым жюри аклен.
Пытартышлан кажне ешлан шке регион нерген каласкалаш кӱлын. Тыште Соловьемыт еш оза, ача, пелаш поснак ойыртемалте да залын кумылжым вигак савырыш. Тудо погынышо-влак дене тӱҥалтыште йӧратыме республикнан кузе маналтмыж, йӧратыме оланан лӱмжӧ, Йошкар-Олаште ик эн ойыртемалтше вер кушто улмо нерген изирак викториным кӱчык жапыште эртарыш да вара веле Набережный нерген видеороликым ончаш темлыш. Туштыжо ача, ава да кажне икшывышт ты кумдыкышто улшо памятник нерген каласкалышт да тыге шкешотан экскурсийым эртарышт. Кропиновмыт Килемар районыштышт, Скулкинмыт Марий Элыште, Александровмыт Юрино кундемыштышт улшо ойыртемалтше вер-влак дене палдарышт.
Тылеч вара жюри иктешлымашым ышташ кайыш, а тиде жапыште, мутлан, «Единый Россий» партийын регионысо отделенийжын вуйлатышыжын пашажым жаплан шуктышо Антон Волков тунемше-влак коклаште эртыше «Письмо моей семьи» республиканский конкурсышто сеҥыше-влакым палемдыш да нунылан пӧлекым кучыктыш. Умбакыже Марий кугыжаныш филармонийын коллективше ден мурызыжо-влак погынышо-влаклан изирак концертым ончыктышт. А мероприятий тӱҥалтыште республикын паша да социальный вияҥмаш министрже Марина Островская, Марий Элыште йочан праваже шотышто уполномоченный Ольга Торощина, Марий да Йошкар-Олан митрополитше Иоанн, молат саламлыме мутым ойлышт.
Теве эн вучымо тат толын шуо. Кӧ вара сеҥышыш лектын? Икымше вер дене Йошкар-Ола гыч Соловьевмыт еш палемдалте. Кокымшо верыш Кропиновмыт еш лекте. Кумшо верыште – Скулкинмыт-Орловмыт еш. А Александровмыт-Анисимовмыт ешым «Приз зрительских симпатий» номинаций дене палемдышт.
8 июльышто Чебоксарыште окружной конкурс лиеш. Тушто Марий Элын чапшым Соловьевмыт еш аралаш тӱҥалеш. Нунылан ме сеҥымашым тыланена!
Любовь Камалетдинова
Фотом Марий Элын Паша да социальный вияҥмаш министерствыжын сайтше гыч налме
