Руш географический обществе «Самая красивая страна-2022» фотоконкурсым увертарен.
Финалист-влакым 11 апрель гыч 1 май гутлаште ойырен налыт. Онлайн йӱклымаш 12 май гыч 31 майыште эртышаш. А кызыт конкурсыш ушнаш шонышо-влак шке фотопашаштым колтен кертыт. Тиде кеч-кӧ, коч-могай ийготан, гражданстван еҥ лийын кертеш. Ик условийым гына шуктыман: фотографийым Российыште ыштыман. Икымше гана конкурс 2015 ийыште эртен. Тунам 25 тӱжем участник 250 тӱжем пашам колтен. А шым ий жапыште 570 тӱжем фотогорафий марте кушкын.
Тыгай номинаций-влак палемдалтыныт: Пейзаж, ир янлык, кайык-влак, стихийын магийже, Россий кайыкын чоҥештылме кӱкшыт гыч, Россий чурийывылышлаште, илыше архив, ир пӱртӱсын сымыктышыже (арт-фото), макромир, вӱд йымалсе тӱня. Кажне номинацийыште тӱҥ приз 250 000 теҥгеш шуэш.
Специальный приз-влак лийыт: зрительский симпатий приз, заповедный Россий, кадр вес велне. Спецпризым сеҥыше кокла гыч кажынже 100 000 теҥгем налеш.
Конкурсын участникше лияш шонышо-влак photo.rgo.ru сайтыште регистрацийым эртышаш улыт. Икымше этапыште фотопаша-влакым 14 эксперт аклаш тӱҥалеш.
С.Носова
