«МАРИЙ ЭЛ» ТАЧЕ

Эн кугужо – кило утла

Шукерте огыл Волжский лесничествыш пурышо Кумъяр ерыште республикысе чодыра озанлыкыште пашам ыштыше еҥ-влак ий йымач колым кучымо шотышто таҥасеныт.
Чыным каласаш гын, ты отрасльыште ыштыше-влаклан Марий Элын Пӱртӱс, экологий да йырым-йырысе средам аралыме министерстве идалыкын кажне пагытыштыже гаяк нуным пырля чумырымо эре могай-гынат оҥай мероприятийым эртара. Тидыже йӱлаш савырнен, манаш лиеш. Ты гана пырля колым кучымаште таҥасеныт. Министерствынат, подведомственный учреждений да чодыра арендатор-влакын пашаеҥышт ушненыт. А тиде – кок еҥан 32 команде.
Мыняр нелыт колым кучымым жюри иктешлен. Сеҥышыш Килемар лесничестве гыч Вячеслав Яранцев ден Александр Гулин икымше верыш лектыныт. Кокымшо верыште Пушеҥгым обрабатыватлыше заводын, кумшышто «Звенигово лес» ООО-командышт лийыныт. Посна колызо-влак коклаште Вячеслав Яранцев, Александр Орлов да Дмитрий Загайнов сеҥеныт. Министерствын посна призше дене 1110 грамм нелытан колым кучымылан Марий Эл Республикын Чодыра дене пайдаланыше-влакын ушемыштым вуйлатыше Владимир Суслов палемдалтын.
С.Носова
Снимкыште: тений колызо шуко лийын.
Фотом министерствын пресс-службыж гыч налме.

Опубликовать в Одноклассники

Добавить комментарий