Федерал льготник-влак социальный услуго наборым налме йӧным 1 октябрь марте вашталтен кертыт.
Марий Элыште федеральный льгото дене пайдаланаш праван 68 тӱжем еҥ ила. Нунылан чылаштланат тылзе еда социальный услуго наборым пуртыман окса выплате ойыралтеш. Тыгодым палемдыме услугым натуральный формо але окса дене налаш йӧн пуалтеш.
Социальный услуго наборым налме радамым идалык еда вашталташ лиеш. Тидланже келшыше йодмашым Кугыжаныш услуго порталыште личный кабинет гоч электрон йӧн дене але РФ Социальный фондын клиент службыштыжо да МФЦ-ште шкеак пуаш кӱлеш. Льготник кызыт улшо йӧн дене ончыкыжат пайдаланынеже гын, йодмашым пуыман огыл.
Социальный услуго набор эмым, санаторийыш да курортыш путёвкым яра налаш, эмлалтме верыш ола воктенысе кӱртньыгорно да ола-влак кокласе транспорт дене яра миен толаш правам пуа.
Тылзе еда тӱлыман окса выплатлан правам налме икымше ийын социальный услуго набор натуральный йӧн дене ойыралтеш.
Тений социальный услуго наборын ик тылзаш кугытшо – 1469 теҥге, тышечын 1132 теҥгеже эм препаратлан ойыралтеш, 175 теҥгеже – санаторийыш да курортыш путёвкылан да 162 теҥгеже – корнылан.
Россий Федерацийын Пенсий да социальный страхований фондшын Марий Элысе пӧлкаже граждан-влаклан льготым але оксам ойырен налме шотышто сайын шоналташ темла. Соцпакет (але тудын ужашыж) деч шӧрлаш гын, тудым идалык гыч веле пӧртылташ лиеш. Марий Элыште 16,5 тӱжем утла еҥ социальный услуго наборын натуральный йӧнжӧ дене тичмашнек але ужашын пайдалана.
Ушештарена, федерал льготниклан Кугу Отечественный сарын участникше, «блокадник», инвалид ден инвалид йоча, радиацийын зиянжылан кӧра тазалыкым лунчыртышо граждан-шамыч, боевой действий-влакын ветеранышт да моло еҥ шотлалтыт.
М.ИВАНОВА
