МАРИЙ ТӰНЯ

Делегатым ойырат

Тений шыжым 31 октябрь–2 ноябрьыште XII Марий калык погын лиеш.
Погынлан ямдылалтме оргкомитетым Марий Эл правительстве председатель Юрий Зайцев вуйлата. Мер Каҥаш вуйлатыше, Оньыжа Эдуард Александровын увертарымыж почеш, 1 июнь гыч республикысе районлаште, марий-влакын Российысе регионлаште тӱшкан илыме делегат-влакым сайлаш тӱҥалыныт. Погынлан ямдылалтме пашаште тидыже ик эн тӱҥ йодышлан шотлалтеш. Делегатым сайлымаш 31 август марте шуйна. Икымше тыгай погынымаш 7 июньышто Волжскышто эртен. Кажне районышто кечым палемденыт.
Делегатым 1 100 еҥ деч иктым сайлат. 385 еҥ лийшаш. Тыгак тер Каҥашын 45 еҥже, тергыше комиссийын 3 еҥже да пытартыш Погынышто пунчалме почеш кызыт марте Мер Каҥашын мыняр вуйлатышыже лийын, нунат делегатыш пурат. Чылаже 438 делегат погына.
Сайлымаш рейтинг йӱклымаш гоч эртышаш. Эн шуко йӱкым погышо-влак сеҥышыш лектыт. Варажым кажне район конференцийым эртарышаш. Тушто Мер Каҥашын еҥже ныл ий жапыште ыштыме пашажым иктешлышаш. Шке илемысе калыкшын темлымашыжым, йодмашыжым погыныш намиен шуктышаш.
Черетан Марий калык погын Россий президент В.Путинынын тенийлан увертарыме Еш идалыклан пӧлеклалтеш. Тушто вич секций пашам ышташ тӱҥалеш: «Еш да йӱла», «Еш да тӱвыра», «Еш да шинчымаш», «Еш да тазалык», «Еш, шанче, цифровизаций».
Кодшо погыныш 19 регион ушнен. Тиде мер ушеман, национальный автономиян, диаспоран кундем-влак. Тений марий-влакын тӱжем утларак илыме 20 кундемыш серышым колтымо. Шым регионышто тӱп марий калык ила. Сандене тушто эн шуко делегатым сайлат.
С.Носова
Снимкыште: Э.Александров
Авторын фотожо

Опубликовать в Одноклассники

Добавить комментарий