Регион вуйлатыше Юрий Зайцев Медведево районыш паша дене миен коштмыж годым социально кӱлешан объектым чоҥымо паша шукталтмым ончен савырнен.
2025 ий ноябрьыште республик вуйлатышылан вияш линий дене эртарыме мутланымашыште Медведево музыкальный школышто вер ситыдыме нерген йодышым тарватеныт. Юрий Зайцев посёлкышто чоҥен шуктыдымо циркын зданийже олмеш (тудым 2013 ийыште чоҥаш тӱҥалыныт) Йоча сымыктыш школым ышташ кӱлмӧ нерген каласен. Объектым «Еш» нацпроектыш пуртымо да 2026 ий мартыште пашам тӱҥалме. Тидлан 584 миллион теҥге ойыралтын, тушечын кугурак ужашыже – федерал бюджет гыч. Оралтым 2027 ий 1 декабрь марте шукташ палемдыме.
Юрий Зайцев район вуйлатышылан циркын оралтыжым арален кодымыжлан тауштен.
– Тиде оҥай архитектуран, моло деч ойыртемалтше да ӧрыктарыше сымыктыш школ лиеш. Тудо районлан да республиклан моткоч кӱлешан, – палемден республик вуйлатыше.
Здпнийыште иканаште 340 йочалан тунемаш йӧн лиеш. Чумыр кумдыкшо – 3,3 тӱжем квадрат метр. Тушто йоча-влаклан семӱзгар дене шокташ, мураш, музыкым возаш, кушташ, сӱретлаш да артист мастарлыклан тунемаш класс-влак, занятийлан да репетицийлан кок кугу зал лийшаш.
У объектыште начар тазалыкан-влаклан лектын кошташышт йӧным ыштат.
Ончыкыжым тиде школ тӱрлӧ проектым илышыш шыҥдарыме, выставке, концерт-влакым эртарыме кумдыкыш савырнышаш да Медведево районын, тыгак пӱтынь Марий Элын визитный картычкыжлан шотлалтшаш.
Марий Эл Республикым вуйлатышын пресс-службыжын уверже негызеш Алевтина Байкова ямдылен.
