Донецк ден Луганск калык республикылаште илыше-влакын сеҥымашыштлан ӱшаным, тидын шотыштак Российын увертарыме спецоперацийыште участвоватлыше военный-влак дене ик шонымашан улмым ончыктышо Z буквам таче тӱрлӧ объектыште ужаш лиеш: вургмыште, машинаште, оралтыште.
А теве Медведево районысо Краснооктябрьский посёлкышто илыше ресторатор Иван Антропов тыгай буква форман, туштак Российын символикыжым кучылтын, тутло кочкышым ямдылен да тидым шке Youtube-каналыштыже ончыктен.
Ушештарыман, шукерте огыл ресторатор ты каналыште шке мӧҥгыштыжӧ кочкышым кузе ямдылымыжым ончыкташ тӱҥалын. 14 выпускат лектын. Тӱҥ шотышо тидлан тудо лачшымак Марий Элыште ончен куштымо кушкылым, тӱрлӧ шылым, моло йӧрварым гына кучылтеш.
«Кочкыш кеч-могай пагытыште еҥ-влаклан кӱлеш. Тудо нуным уша, порыракым ышта, кумылыштым нӧлта. А тыгай пуламыр жапыште меат шке кочкышна дене Россий Президентын политикыж дене келшымынам ончыктена, элна, тыныс илыш верч улына, чыла сай лиеш манын ӱшанена», – каласыш тудо шке плита воктеныже.
А шкешотан кулинарный акцийжылан тудо чыве шыл гыч рулетым ойырен налын. Кӧргыжлан ошвоҥгым, шоганым жаритлен. Рулетшым лугымо муныш чыкен луктын, сукара пудыргыш варен, ончыч жаритлен, вара коҥгаш кӱктен луктын. Юля пелашыже да Максим йолташыже тудлан блюдым сылнештараш полшеныт. А тидлан нуно Российын флагысе гай кочкышылык чия-шамычым кучылтыныт.
С.Носова
Снимкыште: кочкышым ямдылыме годым.
М.Скобелевын фотожо.
