КУЧЕМЫШТЕ

«Чылажымат олмыкташ кӱлеш»

Таче Марий Элым вуйлатыше спорт да культур объект-влакым ончен савырнен.

Ю.Зайцев Волжскышко паша дене мийымыж годым «Ариада» ий-унагудо комплексыш пурен. Тиде зданий – частный собственностьышто, да оза объектше дене ынде икмыняр ий огеш пайдалане. Палемдыме почеш кучылташ тӱҥалаш манын, тудым олмыкташ кӱлеш.

Вес объект – Оласе тӱвыра рӱдер. Зданийым 1972 ийыште чоҥымо, да тудымат капитально олмыкташ кӱлеш. Пел курым жапыште инженер коммуникаций, леведыш, олтымо системе, вентиляций да зрительный зал йӧрдымыш савырненыт.

Республикым вуйлатыше мом ужмыжым совещанийыште иктешлен да оласе объект-влакым шотыш кондаш кӱлмым палемден.

– Волжскышто, моло муниципальный образованийыште семынак, шагал огыл неле йодыш уло. Мутлан, Тӱвыра рӱдер – пеш сайын чоҥымо зданий, тыште чапле зал уло, но чылажымат олмыкташ кӱлеш. Объект кӱлешан, пашам ышта, тыште усталык коллектив-шамыч заниматлалтыт да выступатлат. Волжскышто поян хоккей йӱлалан негызым пыштыме. Йоча-влак ден самырык тукымым спорт да таза илыш-йӱла шӱлышеш воспитатлаш йӧным ышташ кӱлеш, – манын регионым вуйлатыше.

Марий Эл Республикым вуйлатышын администрацийжын информаций пӧлкажын уверже негызеш М.ИВАНОВА ямдылен

Опубликовать в Одноклассники

Добавить комментарий