Михаил Васютин СВО-н сарзыже-шамычлан паша верым квотироватлыме нерген законым илышыш пуртымо дене палдарен.
Марий Эл Кугыжаныш Погынын председательже Михаил Васютин парламентарий Александр Павлов дене пырля Марий Турек муниципал районысо депутат-влак погынымашын латшымше сессийыштыже лийын.
Заседанийыште кандаш йодышым онченыт. Нуно 2026 ийын икымше пелийыштыже Марий Турек районым социально-экономически вияҥдыме пашам иктешлыме, тенийысе 9 тылзыште бюджетын шукталтмыже, районын Уставше ден республикын Сайлымаш комиссийышкыже решатлыше йӱк праван кандидатурым пеҥгыдемдыме, Мариец ял шотан администрацийын да В.В.Свинин лӱмеш районысо рӱдӧ больницын илыме огыл помещенийлаштым весе-шамычлан тӱлыде пайдаланаш пуымо дене кылдалтыныт.
Михаил Васютин депутат-шамыч ончылно выступатлымыж годым Кугыжаныш Погынын кызыт шуктымо пашаже, Кугыжаныш Думо, Федераций Совет да Россий Федерацийын законодательже-шамычын советышт, тыгак элнан субъектласе, ты шотыштак у регионласе законодатель-коллеге-шамыч дене вашкылже нерген каласкален.
Парламентын спикерже законым ямдылен лукмо пашаште лӱмын эртарыме сарзе операцийын участникше-влак ден нунын ешыштлан полшымым ик эн тӱҥ семын палемден.
«Шушаш сессийыште мӧҥгӧ пӧртылшӧ сарзе-шамычлан паша верым квотироватлыме нерген законым пеҥгыдемдаш палемденна: 100 деч шукырак пашаеҥан коллективлан СВО-н участникшым пашаш налаш пашаеҥ-шамычын кокла спискышт почеш лекше чот гыч 1 процент квото ойыралтеш», – увертарен Михаил Васютин.
Кугыжаныш Погынын председательже Россий президент Владимир Путинын бюджет кредит шотышто парымым палынак варарак жапыште шӧраш лийме нерген темлымашыжым палемден.
«Тиде республикын бюджетыштыже средствам арален кодаш да муниципалитет-влак дене бюджет-шамыч кокласе кылым саемдаш йӧным ышта», – рашемден парламентын спикерже.
Михаил Васютин посна тӱткышым агропромышленный комплексым вияҥдыме йодышлан ойырен. Республикнан Юл кундемысе законодатель-влакын советыштышт темлыме 18 инициативыж гыч латкокытшым иктешлыше пунчалыш пуртымо. Нуно яллаште самырык специалист-шамычлан полшымо, пакчасаскам переработатлыме продуктлан НДС-м иземдыме, цифран ялозанлыклан кадрым ямдылыме, йочасад ден школлаште агролабораторий ден агрокласс-влакым почмо, СВО участник-шамыч ден нунын ешыштлан тунемаш да тӱрлӧ грантым налаш йӧным ыштыме дене кылдалтыныт. Михаил Васютинын палемдымыж гыч, инициативе-влак илышыш пурталтыт. Мутлан, Курыкмарий районышто тудын шочмо школыштыжо агроклассым почыныт, йочасадыште агролабораторий пашам ышташ тӱҥалын.
Вашлиймаште сайлыше-влакын наказышт нергенат радамын мутланыме. Тенийлан палемдыме 111 йодмаш гыч 98 процентшым шуктымо. Парламентын спикерже Марий Турек район администрацийым вуйлатыше Сергей Решетовлан пашам сайын шуктымыжлан да наказ-влакым илышыш пуртымыжлан тауштен. Тыгодым весымат палемден: 2027 ийыште наказ-влак инфраструктур йодыш – автомобиль корным олмыктымо гыч тӱҥалтын йолешке-шамычлан тротуарым чоҥымо марте – дене кылдалтше лийыт.
Депутатын кечыштыже районысо парламентарий-влак илышлан кӱлешан да социальный сфер объект-влакым 2026-2027 ийласе йӱштӧ жаплан ямдылыме йодышым онченыт, тыгак Хлебниково ял шотан илемысе тӱвыра тӧнеж-шамычын пашашт дене палыме лийыныт.
Тылеч вара Кугыжаныш Погынын председательже граждан-шамычлан приёмым эртарен. Марий парламентын спикерже деке Хлебниково да Сысоево школ-влакын директорышт тунемме заведений-шамычым капитально олмыктымо федеральный программыш пуртымо йодыш дене толыныт. Михаил Васютин тиде программыш пурымо радам дене палдарен да йодмаш пелен умылтарыме шотан запискым ямдылаш темлен. Йодышым тыгак регионысо профильный министерстве ден район вуйлатыше пырля ончышаш улыт.
Паша вашлиймаш мучаште Михаил Васютин Марий Турек район администрацийым вуйлатыше Сергей Решетов да районым вуйлатыше, депутат-влак погынымашын председательжын пашажым шуктышо Лариса Яндыбаева дене пырля чыла жапысе герой-влаклан пӧлеклалтше «Шарнымаш пырдыж» мемориал воктеке пеледышым пыштен.
Тиде объектым «Оласе йӧнан йырвелым ыштымаш» федеральный программын да «Илыме вер да оласе йырвел» национальный проектын полшымышт дене уэмдыме. 2025 ийыште мемориалыш коммуникацийым шупшмо, Шарнымаш тулым чӱктымӧ да кумдыкыш тӱрлӧ кушкылым шындыме.
«Йодмашдам шукташ эре кумылан улына – районысо калыкын илышыжым пырля гына саемден кертына», – чеверласыме деч ончыч палемден Михаил Васютин.
Маргарита ИВАНОВА.
Марий Эл Кугыжаныш Погынын пресс-службыжын фотожо.
