15 июньышто 9 гыч 13 шагат марте МЭТР телеканалын вияш эфирыштыже Марий Эл гыч военнослужащий-влаклан – специальный военный операцийын участникше-шамычлан – полшымо шот дене оксам погымо поро кумыл телемарафон эрта.
Эфирыште мер пашаеҥ-влак, регионысо администраций-шамычын представительышт ден боевой действий-влакын ветеранышт СВО-што участвоватлыше землякна-шамычлан полшымо паша опытышт дене палдарат, «Калык фронт. Чылажат – Сеҥымашлан!» поро кумыл фондым лачшымак молан почмо да регионысо кажне еҥын сеҥымашым лишемдаш могай надырым ыштен кертмыж дене палдарат.
«Телемарафоным эртарыме кечым шоналтыде ойырен налме огыл. Лачшымак ик ий ончыч Калык фронт элыштына передовойышто улшо сарзе-шамычлан полшымо «Чылажат – Сеҥымашлан!» лӱман кугу проектым илышыш пуртен. Тиде жапыште поро кумылан калыкын, амалкалче ден организаций-влакын тыршымышт дене ме землякна-шамычлан военный спецопераций эртыме кумдыклашке 20 тонн утла гуманитар грузым поген колтенна. Командыштына улшо чыла еҥлан тауштена, да регинысо калык, сарзе-влак дене икоян улмыжым ончыктен, спецоборудованийым налаш кӱлшӧ суммым погаш угыч полша манын ӱшанена», – палемда Марий Эл Республикысе Калык фронтын исполкомжым вуйлатыше Валентин Севастьянов.
Оксам регионысо специальный QR-кодыш погаш тӱҥалыт, тудыжым проектын https://pobeda.onf.ru/reguirements/mariiel официальный сайтыштыже ончыктымо.
Погымо чыла оксам военнослужащий-влакын йодмышт почеш оборудованийым налаш кучылтыт. Общественник-шамыч передовойыш спецтехникым наҥгаяш да тудым сарзе землякна-влакын кидышкыштак пуаш шонат.
Ушештарена: Элым аралыше-влакын кечыштым палемдыме кышкарыште эртыше икымше телемарафонышто 600 тӱжем утла теҥгем погымо. Тиде средства дене куд бинокльым, йӱдым ужмо куд прицелым да нунылан оборудованийым налме.
М.ИВАНОВА ямдылен
