Всероссийский ялысе кеҥеж модмаш
Чылаштлан – пиалан стартым!
26-31 июльышто Омск областьыште XIII Всероссийский ялысе кеҥеж спорт модмаш эрта. Тушто Марий Элын командыже вийжым терга.
Такшым элнан чыла регионжо гыч, манаш лиеш, 1500 спортсмен таҥаса. Тыгак Беларусий гыч сборный ушнен.
Спорт еш команде-влак коклаште Кужэҥер район гыч Ельмекеевмыт ден Медведево район гыч Армяковмыт дартсыште, ӱстембал теннисыште, куштылго атлетикыште, шашке дене модмаште вийыштым тергат. Медведево район гыч механизатор-шамыч мастарлыкыштым ончыктат. Дояр-влак коклаштат пеш оҥай троеборье эрта. Ты видыште Советский район гыч дояр-влак таҥасат. Шудым солышо деч поснат ялыште серлагаш ок лий. Шудым сайын солымашке Медведево гыч мастар-шамыч ушнат. А теве полиатлонышто да мини-лапташте Советский район гыч спортсмен-шамыч вийыштым тергат. Килемар район гыч ӱдыр-влак волейбол дене модмаште таҥасат гын, пӧръеҥ волейбол сборныйын чапшым «Акашево» АПК-н пашаеҥже-влак аралат.
Участник-шамычлан пиалан стартым, сеҥымашым тыланена.
Е.Эшкинина.
