Россий Федерацийын Тазалык аралтыш министерствыже COVID-19 деч вакцинаций нерген сертификатыш вашталтышым пуртен.
COVID-19 деч вакцинаций але тиде черым чытен лекме нерген медицине сертификатыш коронавируслан антитела улмо нерген уверым ешарат. РФ Минздравын тыгай шотан кÿштыкшым правовой уверын официальный интернет-порталыштыже савыктыме.
Документ 2022 ий 21 февраль гыч вийыш пура. Тылеч посна тушто тиде жап гычак антитела улмо негызеш QR-кодым налаш лиймым пеҥгыдемдыме.
Россий Федерацийын премьер-министрже Михаил Мишустин правительствын заседанийыштыже вакцинаций деч медицине велым кораҥдалтме уверым Кугыжаныш услуго порталыште вераҥдыме нерген ойлен. Тыгак кызыт тиде порталыште у коронавирус инфекций деч прививкым ыштыктыме да черым чытен лекме нерген кÿлешан уверым налаш лийме нерген ушештарен.
М.ИВАНОВА
