Марий Эл правительстве председательын алмаштышыже – республикын тӱвыра, савыктыш да калык-влакын пашашт шотышто министрже Константин Иванов Кугыжаныш йылме-влак шотышто правительственный комиссийын заседанийжым эртарен.
Комиссийын членже-влак тунемме пособийым ямдылыме, «Марий Эл» увер агентствын, Марий книга издательствын пашашт нерген мутланеныт.
Марий Эл Образований да науко министрын алмаштышыже Валентина Гаврилова тений шым тунемме пособийым ямдылыме манын каласен. Тыге 5-9 -ше класслан «Марий йылме» тунемме пособийын линейкыжым учебниклан келшен толшым ыштеныт. Тылеч посна паша тетрадь ден методике пособийым, учебник-шамычын электрон формыштым ямдыленыт. Электрон учебник дене пайдаланыме инструкцият уло.
«Шочмо йылме-влакын федеральный институтшо пелен эртыше заседанийын иктешлымашыж почеш, мемнан ямдылыме учебникна-влакым федеральный переченьыш пурташ темленыт. Ӱшанена, тидым тений идалык мучаш марте ыштен шуктат», – палемден Валентина Гаврилова.
Марий книга издательствын директоржо Эдуард Иманаев организацийжын всероссийский книга ярминга-влакын пашашкышт кажне ийын ушнымыжо, поэт ден писатель-шамыч дене вашлиймашым эртарыме нерген ойлен. Таче кечын издательствын савыктыме книгажым Марий Элыште гына огыл, тыгак Татарстаныште, Удмуртийыште, Башкортостаныште да марий-влакын тӱшкан илыме моло кундемлаштат вучат.
«Марий Эл» увер агентстве директорын икымше алмаштышыже Александр Абдулов редакций-влакын пашаеҥышт Марий Эл деч ӧрдыжтӧ илыше марий-шамыч деке творческий группо дене миен коштыт манын палемден. Журналист-влак деке артист, писатель-шамычат ушнат. Шушаш 2025 ийыште тыгай шотан мероприятий-шамыч марий йылме дене лекше «Война увер» газетын 110 ияш лӱмгечыжым палемдымылан пӧлеклалтыт.
Лидия ШАБДАРОВА
