Татарстанысе Кукмарий район Уялыште эртыше Семык пайрем годым спорт аланыште тӱрлӧ семын таҥасеныт. Но эн шуко еҥым «Чумбылатын вийже» кубоклан таҥасымаш чумырен.
Организаторжо – кызыт Москошто илыше урал марий, Российын силовой многоборье федерацийжын президентше Иван Мечишев. Семыкыш тудо лӱмын мотоцикл дене кудал толын.
Таҥасымаш вич кужыт дене эртен. Тудын радамышке организатор кидвий дене шуктымо многоборье гыч тергымаш-влакым пуртен. Атлет-влак пырням, ошман мешакым нӧлтеныт, кирам кышкеныт, печкем ик вер гыч весыш кусаркаленыт да пырням савыркаленыт.
Таҥасымашке шукын ушненыт. Коклаштышт самырыкат, илалшыракат лийыныт манаш лиеш. Одо рвезе Дмитрий Исламов абсолютный чемпион лӱмым сеҥен налын. Тудо Уялыштак ила да Озаҥыште манипуляторын водительжылан пашам ышта. Ялыште лиймыж годым яра жапыште шкенжым спорт дене шуараш кумылан.
Шукерте огыл Иван Мечишев Йошкар-Олаш толын коштын да Мер каҥашын еҥже-влак дене вашлийын. Тудо марий-влакын тӱшкан илыме регионлаште «Чумбылатын вийже» кубоклан ойырен налме тур-влакым эртараш шонымыж нерген увертарен. А тыгай туржо-влакым Пеледыш пайрем, Семык гай пайремла годым эртараш келшен толыт. Лач тыгай икымше тур Уялыште гӱжлышӧ Семык годым лийын.
Эн тале атлет-влак 28 июньышто Йошкар-Олаште эртаралтше Пеледыш пайремыш толыт да шке коклаштышт таҥасаш тӱҥалыт.
Светлана Носова
Михаил Скобелевын фотожо.
