Шочынам мый Морко район Алсолаште 85 ий ондак кӱтӱ пурымо жапыште. Индешымше икшыве! Мастар кидкучышан ачамым ялыште Апшат Юки маныныт. Сар тӱҥалмеш ме икмардан иленна. Мо лийын, чылажым кок ияш йоча ом шарне. Натале акам, повесткым налмек, Сурокыш лектын кайыш. Олюк акамым Провой кундемышке окоп кӱнчаш нальыч. Ачам Уралыш военный заводыш кудале. Вара Миклай изамлан черет толын шуо. Пел идалык гыч ойган уверым нална: орудий командир М.И.Иванов Львов олам утарымаште увер деч посна йомын.
Авам мыйым туныкташак тыршен. Алсола нылияш, Азъял шымияш, Морко кыдалаш школлаште тунемынам. Вара илыш корнем Йошкар-Оласе культпросветучилище, пединститут, Москосо Рӱдӧ телевидений пеленысе институтла гоч эртен. Кум ий армий радамыште лийме деч вара илышем телевидений дене кылдалте. Ӱмырем мучкылан погымо шинчымашым лач телевиденийыште пайдалын кучылт кертынам: режиссёр, журналист да шке программем-влакым вӱдышӧ лийынам.
Ямдылыме передачем-влакым кугурак ийготан тукым кызытат шарна, шонем. Тиде – ял калыклан ямдылме «Мланде», «Илыш корно», «Шочмын кастене», «Шочмын кастенын почтыжо» (вара эфирыш «Шӱмсем пӧлек» лӱм дене лектын), тыгак кумдан палыме «Пӱрымаш» программа. Тылеч посна мый, сарын икшывыже, изам семынак сар тулеш йомшо, йӱлышӧ салтак-влакым кычалынам. Кычалам але мартеат. Подольский курсант-влакым шымлен, марий олаштына нунын лӱмыштым нумалше урем шочо. «Шоссе воктене обелиск» книга ош тӱням ужо. Вара «Династия Контских», «Максимилиан – мой внук» савыкталтыч. Кызыт Морко кундемем да телевидений нерген книгам ямдыленам.
Пашам аклыме шотыштат икмыняр мутым ойлаш лиеш. Да, акленыт, нӧлтеныт, ӱшаненыт. Телевиденийыште ыштымем годым профком комитетым вуйлатенам, партгруппорг, кок созыв Заводской районын депутатше лийынам. Тыгак «Марий Эл культурын сулло пашаеҥже» лӱмым нумалам. Кугешнен нумалам «Ветеран труда» да «За пробразование Нечерноземья» медаль-влакым.
Эртыше кужу корнем кугешнен шарналтем, но ожно налме ошкылемым волташ ом шоно. Поснак кодшо октябрь тылзын пелашем ден верысе врач-влак колымаш деч утарымек, илышым ялт вес шинча дене ончем. ИЛЕ — Е — ЕМ ынде!
Лидия СЕМЕНОВА ямдылен
Фотом еш альбом гыч налме
(Иван Ивановын «Кумылаҥдыше шыже» новеллыжым 2024 ий 24 сентябрьыште лекше газетыштына лудса)
