20 апрельыште Российыште донор-влакын кечышт палемдалтеш.
Нунын поро да весым чаманыме кумылышт, полшаш ямде улмо койышышт ойгыш логалше мыняр тӱжем дене еҥын илышыжым арален кодаш полшен?!
А ме палена: вӱрым весылан пуышын суапле пашажлан окса огеш тӱлалт – чылажат шке кумыл дене кылдалтын. Юмылан тау, тӱняште поро еҥ шуко.
Йолташ-влак, Те иктаж гана донор лийында мо? Весылан вӱрым пуышо-влакын поро пашашт шотышто мом каласен кертыда?
Иван Богомолов, Российысе сӱретче ушемын йыжыҥъеҥже:
– Илышыште кеч-кӧат эҥгекыш але туткарыш логалын кертеш. Донор лийме пеш пайдале. Ик палыме ӱдырамаш эмлымверыште пашам ышта, тудо – почётный донор. Тыглай надырже куандара, палыдыме вес айдемылан вӱржым, изи шийвундо тӱлымым шотлыде пуа, тыгак шке кумылжо дене полышлан шотла.
Полина Пуртова, «Марий Эл» ГТРК-н радио службыжын корреспондентше
– Донор семын ятыр гана Вӱрым налме станцийыш миенам, но кажне гана мӧҥгеш колтеныт. Ик гана группем йӧрен огыл гын, а вес гана гемоглобинем изирак лийын. Тазалык шотышто чарак огеш лий гын, полшаш эреак ямде улам. Весылан вӱрым пуышо еҥ-влак дене моткоч кугешнем, вет нуно сай, поро пашам шуктат: вес айдемым илыш туткар гыч арален кодаш полшат. Иктаж жап гыч мыят тиде радамыште лиям манын ӱшанем.
Андрей КОШАЕВ, кидмастар:
– Вӱрым икымше гана Марий кугыжаныш университетыште тунемме годым сдатленам. Тунам группо дене кайыме, туныктышемлан полыш кӱлеш ыле. Кызытат вӱрым, плазмым пуаш коштам. Кертме семын шке кумылын полшашак тыршем. Шкешотан сай, поро пашам ыштымыла чучеш. Ала иктажлан илыш утарымаште полша. Виеш ыштыктен, шот ок лек. Адакшым вет чылалан тиде процедурым ышташ огеш лий, тазалык шот денат кажныже тӱрлӧ улына. Санденак вӱр сдатлыме верыште врач-влак тидым тӱткын эскерат.
Любовь МИХАЙЛОВА, йочасадын воспитательже, Ижевск ола:
– Донор лийын омыл, но кумыл уло. Весылан вӱрым пуышо-влакын поро пашаштлан куанен кӧранем. Вет нунын вӱрышт вес еҥлан илышым, вийым, шке ужашым пуэн кертеш. Ик тыгай случайым сайын шарнем: родо-тукым гыч ик ӱдырамаш эмганен да кочам вӱржым пуэн. Лач тудын вӱржӧ ойгыш логалшылан чыла шот денат келшен толын. Кузе шокшо вӱр капше мучко каяш тӱҥалын, садет вик таушташ тӱҥалын да ятыр ий эртымекат тауштен илен.
Садлан донор лияш – моткоч кӱлешан да пайдале.
Игорь АНДРЕЕВ, водитель:
– Илышыштем кок гана Вӱрым налме станцийыш миенам. Икымше гана 1988 ийыште службым эртыме жапыште донор лийынам, а вес гана – заводышто пашам ыштымем годым. Кызытат ты поро пашам ышташ кумылан улам.
А теве пелашемын ачаже илышыштыже моткоч шуко гана донор лийын да шуко еҥын илышыжым арален кодаш полшен. Суапле пашажым шотыш налын, «Российын Почётан доноржо» лӱм дене палемдалтын. Тудын поро пашажым порын гына шарнен илена.
А.БАЙКОВА
Авторын да еш альбом гыч налме фото
