Кукшо да чот шокшо игече шогымылан кӧра 3 июль гыч Марий Элыште IV класс пожар лӱдыкшымылык палемдалтын.
Тидлан кӧра республикыште илыше ден уна-влаклан чодыраште лияш, тушко транспортын чыла видшыланат пураш чаралтеш.
Пожар лийын кертме лӱдыкшӧ жапыште тыгак тулотым ышташ, кукшо шудым, шӱкым йӱлалташ, ола ден ял илем чеклаште пожарым ыштен кертше пашам шукташ, тулым кучылташ, тыгодым кочкышым ямдылашат, пӱртӱс пожар лийын кертме лӱдыкшӧ уло гын, поселко, села, ялла, тыгак даче ден сад участкылаште пиротехнике дене пайдаланаш чаралтеш.
Марий Элысе чодыралаште вияҥдыме патрулирований эртаралтеш, кожлаште пожар лӱдыкшыдымылык правилым пудыртымым ужаш да тидым чараш манын, фото ден видеофиксаций йӧн-влак кучылталтыт.
Посна пожар лӱдыкшӧ режим жапыште пожар лӱдыкшыдымылык правилым пудыртымылан тыгай штраф палемдалтын:
– еҥ-влаклан 40 гыч 50 тӱжем теҥге марте;
– должностной лица-влаклан – 60 гыч 90 тӱжем теҥге марте;
– юридический лица-влаклан – 600 тӱжем гыч 1 миллион теҥге марте.
Чодыраште пожарым ужмеке, «Авиаохранын» диспетчерский управленийын региональный пунктышкыжо 8 (8362) 56-65-35, вияш линийыш 8 800 100 94 00 номер дене але 112 номерыш увертарыман.
Марий Эл Республикым вуйлатышын пресс-службыжын уверже негызеш Л.Камалетдинова ямдылен
Д.Речкинын фотожо
