Марий Элым вуйлатыше Юрий Зайцевын вуйлатымыж почеш, республик правительствын эртарыме заседанийыштыже 2024 ийысе иктешлыше кугыжаныш аттестаций, шошо вӱдшорым аварий деч посна эртарыме да кундемысе чодыралаште пожар лӱдыкшыдымылык дене кылдалтше йодышлам каҥашеныт.
Пӱртӱс ресурс, экологий да йырым-йырысе средам аралыме шотышто министр Алексей Киселев палемден: чодыра пожар ик эн чӱчкыдын айдемын тулым шекланыде кучылтмыжлан да волгенчын перымыжлан кӧра лиеш. Тымарте ылыжше тулым икымше кечылаштак йӧртен кертме. Титакан-влак мутым кучаш тӱҥалыт. Чодыра пожар ваштареш профилактикым эртараш (патрулироватлаш, видео дене эскераш) да тудым йӧрташ министерствылан тений 70 миллион теҥге наре оксам ойырымо.
Марий Элым вуйлатыше задачым шынден: тул ылыжмым пален налмеке, тудым йӧрташ кӱлеш мерым вигак приниматлаш.
Республикын образований да науко министрже Лариса Ревуцкая регионышто тунемме верлаште иктешлыше кугыжаныш аттестацийын эртымыж дене палдарен. Тенийысе ГИА-ште 9-ше ден 11-ше класслам тунем пытарыше 10 тӱжем утла выпускник шинчымашым терген. Тургым жаплан кундемыштына экзаменлан 125 пунктым почмо, образований пашаеҥ-влак регион да федеральный кӱкшытыштӧ тунеммашым эртеныт. ГИА-н участникше-влакын вашмутыштым аклаш 24 предметный комиссийым чумырымо, тушто чылаже 636 еҥ уло. Лариса Ревуцкаян мутшо почеш, 2024 ийысе экзамен кампаний палемдыме семын эрта, организаций да технический могырым нимогай чарак лийын огыл. Тудо тыгак ешарен: Россий Федераций президент Владимир Путинын тӱҥалтышыж почеш 4-5 июльышто ЕГЭ-м уэш кучаш йӧн ышталтын, тыгодым ончычсо результат ок шотлалт. Тидыже выпускниклан шукырак баллым погаш да вузыш тунемаш пураш сай йӧн. Экзамен кампанийым 17 июльышто мучашлаш палемдыме.
Марий Эл вуйлатышын администрацийжын пресс-службыжо уверже негызеш Г.Кожевникова ямдылен
