УВЕР ЙОГЫН

«Чодыра йомак» уэш канаш ӱжеш!

Чодыра лоҥгаште, сылне ер воктене, верланыше тиде йоча санаторийын капка воктеныже улмына годымак икшыве-влакын йӱкыштым колна: шагал огыл жап «каныме» деч вара «Чодыра йомак» эмлыме да тазалыкым пеҥгыдемдыме комплекс тений 2 июньышто уэш шке омсажым почын да икымше сменыш толшо ӱдыр-рвезе-влакым вашлийын.

Каласыме – ыштыме

Ушештарена, 2021 ий тӱҥалтыште «Чодыра йомакым» торгыш лукмо нерген увер шарлен. Тудо икмыняр йодышым иканаште луктын: пого дене умбакыже мо лиеш, санаторийыште ыштыше-влак пашавер деч посна кодыт мо, а эн тӱҥжӧ – ончыкыжым тусо тыгаяк лӱман ер воктене канаш йӧн лиеш мо? Реорганизаций шотышто мутшо парымлан кӧра лектын – шукыжым илыме вер да коммунал озанлыклан. Марий Элым вуйлатыше Юрий Зайцев эше ӱмаште шыжым тиде санаторийым пытараш тӱҥалмылан чаракым ыштен да ты шотышто пунчалыш кидпалыжым пыштен. Тудын палемдымыж почеш, каныме верым да тусо мландым налаш кумылан лийыныт, но регионым вуйлатыше ты объект республиклан кӱлешан манын каласен. Пунчал дене келшышын, предприятий кугыжаныш автономный тӧнежыш савырнен, а учредительже Марий Эл Образований да науко министерстве лийын. Вес озан кидышкыже куснен гынат, тудын тӱҥ пашаже ончычсо семынак  – йоча да кугыеҥ-влаклан эмлалташ, тазалыкым пеҥгыдемдаш да канаш йӧным ышташ. Пресс-конференций годым Юрий Зайцев йоча лагерьым уэмдаш задачым шынден. Ончыкыжым тудым идалык мучко ыштыше режиманыш кусараш, профилян сменым эртараш, йоча да самырык-влакын общероссийский у толкыныштын пашаштым организоватлаш палемденыт.

Москва, Владимир, Озаҥ, Ямал…

Тазалыкым пеҥгыдемдыме да каныме комплексын тачысе директоржо  Дмитрий Петрович Цетва, а «Чодыра йомак» йоча лагерьын Вугар Ибрагим-Оглы мийымына жапыште паша дене кудалыныт ыле, сандене тысе сӱрет дене мемнам воспитаний паша шотышто алмаштыше, Марий Эл тӱвыран сулло пашаеҥже Ольга Васильева палдарыш.

Кудывече дене эртыме годым ме эн ончычак кумшо отрядым вашлийна. Йоча-влак вожатыйышт Инна Пирогова ден Константин Плотников дене пырля ик корпус гыч весыш англичан йылме кружокыш, занятийыш речёвко почеш ошкылыныт. Ольга Васильевнан мутшо почеш, «Мультипультия» лӱман тиде сменыште (2-15 июньышто) чылаже 40 наре икшыве кана. Каласыман, нуно Марий Эл гыч веле огыл улыт, толыныт Киров область, Москва, Владимир, Озаҥ, Ульяновск, Зеленодольск олала, эсогыл Ямал гыч.

 

 

Ӱшанымылат ок чуч: тыште – «Кинокампус»!

Ынде ме йоча-влакын илыме корпусыштын кокымшо пачашышкыже  кӱзышна. Ольга Васильевнан ойлымыж почеш, икымше пачашыште олмыктымо паша эше мучашлалтын огыл. Кокымшо пачашысе илыме пӧлем-влакым шотыш кондымо, сандене йоча-влаклан илаш условий уда огыл манын каласаш лиеш, но ыштышаш пашажат шагал огыл: коридор кӱварым, пырдыжым да молым уэмдыман. Мийымына годым коридорын ик кумдыкыштыжо икымше отрядлан психологий дене занятийым Светлана Радова эртарен. Ик тыгай «тренинг» манмыштет меат йоча-шамыч дене пырля шкенам терген ончышна да умбакыже тӱҥ корпусын актовый залышкыже пурышна. А туштыжо, паледа, кӧмыт занятийым эртеныт? Пален налмеке, ӱшанымылат ыш чуч – Москвасе кумдан палыме, элнан ик эн тоштылан шотлалтше М.Горький лӱмеш киностудийын «Кинокампус» кино да медиа школжын педагогшо-влак! Тиде – Владимир Канухин, Марина Воронина да Александр Знобищева. Нуно мемнан Марий Элыш кок арнялан гына толыныт да ты жапыште тиде санаторийын лач ты сменыштыже лийше йоча-влакым актёр мастарлыклан, сценыште мутланаш, камере деч лӱдаш огыл да шуко молылан туныктат, тӱрлӧ мастер-классым ончыктат. Чылаже кум направлений дене моштымашым вияҥдат: «Фильммкейкинг усталык лабораторий», «Актёр мастарлык студий» да «Блоггинг да журналистике дене студий». Каласыман, «Кинокампус» школ Марий Элышкына икымше гана толын, ик сменылан гына, сандене таче «Чодыра йомакыште» элнан тӱрлӧ регионжо гыч канат.

– Тиде студийым мемнан лагерьыш мый шке ӱжынам. Моло каныме верын программыштым ончал лекмеке, иктешлымашем тыгай лийын: чыла вере гаяк шукыжым военный тематике дене кылдалтше мероприятий-шамыч улыт. Тиде кӱлеш, но йоча-влакын моштымашыштым вес могырымат вияҥдыман манын шоналтен, «Кинокампус»  школын программыжым ойыренам. Латныл кечыште тудын педагогшо-влак ӱдыр-рвезе-влакым кино тӱняш «пуртат»: фильмыште сниматлалташ да фильмым сниматлаш, видеом ышташ тунемыт.  Тиде кечылаште кажне отрядлан сценарийым возеныт, йоча-влак тушто сниматлалташ тӱҥалыт.  «Кинокампусын» педагогшо-шамыч чыланат Москвасе ВГИК-ым тунем пытареныт, актёр веле огыл, режиссёр улыт, – каласыш  «Каникул» программан йоча лагерьым вуйлатыше Любовь Олеговна Филимонова.

Мучашлан тудо ешарыш: черетан смене тыште Денис Шаблий дене пырля эрта…

Вожатый-влак дене пырля

Актовый зал деч вара уэмдыме столовыйыш пурен лекмеке, Чодыра йомак ер воктеке тарванышна. А тудын серыштыже  икымше отрядыште улшо-влаклан йога дене занятий эртен. Воктенышт вожатый-влак Ксения Наумова, Анастасия Андреева, Максим Протасов да Александр Черепанов  тӱткын эскереныт. Нуно чыланат Оршанкысе И.К.Глушков лӱмеш шуко профилян колледжын студентше-влак улыт, тыште шке кумылын практикым эртат.

– Эр кочкыш да зарядке деч вара йоча-шамыч психологий станцийыште, вара «Англичан йылме» кружокышто лийыныт, – ойла Ксения Андреевна. – Йога дене занятийым нунылан Оршанкысе И.К.Глушков лӱмеш шуко профилян колледжынак студентше-влак Татьяна Косарева ден Карина Канашева эртарат. Нуно тыште практикыште улыт, мыланна полшат.

Каласыман, икымше сменыште йоча-влак шукынжак огытыл гынат, кажне отряд дене тысе педагог, вожатый-влак кӱлешан да пайдале пашам шуктат: яндар южышто каныме дене пырля моштымашыштым вияндаш тӱрло конкурсым, таҥасымашым да моло мероприятийым эртарат. А южшо тыште чынжымак юзо шӱлышан да ержат, икшыве-шамычын йӱкыштым колын, йыли-юли гына коеш.

Г.Кожевникова

М.Скобелевын фотожо

Опубликовать в Одноклассники

Добавить комментарий