Кужэҥер район Аганур ялыште, К.Алексееван фермер озанлыкыштыже, тӱкан шолдыра вольыкын лейкозшо шотышто карантиным увертарыме.
Карантиным «Ветеринарий нерген» закон да Марий Эл Республикысе Ветеринарий комитетын приказше дене келшышын, тӱкан шолдыра вольыкын лейкозшо умбакыже шарлен кертме лӱдыкшым чарыме да тиде черым пытарыме шот дене палемдыме. Тазаҥдыме мероприятий-влак планым пеҥгыдемдыме. Черым пален налме озанлыкыште лейкозын вирусшо шарлен кертмым чарышашлан мероприятий-влак эртаралтыт.
Ветеринарий правил-влак дене келшышын, тиде озанлыкыште теве мом ышташ чарыме:
– черланен кертше вольыкым шӱшкылмӧ предприятийыш але пунктыш наҥгаяш;
– ӧрдыж еҥ-влаклан тиде верыште лияш, тыгодымак вольыкым ончышо, тидын шотыштак черым пытараш колтымо госветслужбо специалист-влак тышке чарак деч посна пурат;
– вольыкым искусственно тӱжаҥдышаш нӧшмым погаш, обработатлаш, аралаш, тышечын наҥгаяш да кучылташ, тыгак вольыкым тӱжаҥдаш ӱшкыжым кучылташ;
– черле, инфекциян да таза вольыкым пырля лӱшташ але дезинфекцийым эртыдыме лӱштымӧ аппаратым кучылташ;
– чыла вольыкын шӧржым ик йоҥгытыш погаш;
– вӱрым налаш;
– кӱтӱм уэмдышашлан черле вольык деч презым налаш;
– киш шӧрым презылан йӱкташ кучылташ;
– черле ден таза вольыклан ик пӧлемыште (родильный отделенийыште) презым ыштыкташ;
– тыгай вольыкым пырля кӱташ.
Пареҥгылан лӱдыкшым ышта
Курыкмарий район ял шотан Красноволжский илем кундемыште (рӱдӧ илемже Кулаковы села) фитосанитарный надзор, пырчын урлыкашыжым да качествыжым тергыше отделын специалистше-влак пареҥгын шӧртнялге нематодыжым муыныт.
Тидын нерген Нижегородский область ден Марий Элысе ветеринарный да фитосанитарный надзор шотышто федеральный службо управлений гыч увертареныт.
Шӧртнялге нематодым мумо вер нерген ял шотан Красноволжский илем администрацийлан да ты кундемыште илыше-влаклан увертарыме , шижтарыме.
Пареҥгын шӧртнялге нематодыжо пареҥгын да томатын вожыштыжо ила, паслен тӱшкашке пурышо моло кушкылымат авалтен кертеш. Черле кушкылышто вондо начарын кушкеш, жап деч ондакрак нарынчалга. Вожсаска шагал, тыгыде кушкеш але йӧршеш ок лий.
Умбакыже шуйна
Сӧснан африкан чумаже авалтыме кундемыште мом ыштыме?
Увертаренна ыле: Медведево ден Советский районлаште 16 отябрь гыч 16 ноябрь марте карантиным увертарыме. Медведево районышто вольыкын черже ваштареш кучедалше станцийын начальникше А.Наместниковын мутшо почеш, Пижма ден Туршо кундемласе ял, тыгак Студенка ден Силикатный поселко-влакым гына лӱдыкшӧ чер шарлен кертме верлан шотлымо огыл. Мероприятийым эртарыме жапыште шке да фермер озанлыкла гыч 262 илыше да 29 шӱшкылмӧ сӧснам кораҥдыме. Нуным Шеклянур ден Есенейсола ялла лишнысе келге лакылаште йӱлатыме.
Тидым палемдыман: «Шойбулакский» племзаводын сӧсна ашныме куатле комплекслажым тиде эпидемий тӱкен огыл. Вет тиде предприятий петырыме режим почеш пашам ышта. Тыште пеҥгыде санитарный режимым кучат. Пашаеҥ ӱмбал вургемжым, йолчиемжым кудаш кода, душыш пурен лектеш, вара веле комплексыш кая. Тидын нерген «Вести» райгазет увертарен.
