Колумб лудмаш – 2023
Чавайнурышто, ойыртемалтше верыште
Кажне кеҥежым Морко районышто регион-влак кокласе Колумб лудмаш сылнымут-сылнысем пайрем эрта да тудо Валентин Колумблан пӧлеклалтеш. Но южо ийын тыгак вес сылнымутчын лӱмгечыжлан келыштаралтеш. Тений гын – поэт Василий Крыловын шочмыжлан 70 ий теммылан. Адакше тений марий сылнымутлан негызым пыштыше Сергей Чавайнын шочмыжлан 135 ий лишемеш. Сандене ты пайрем 30 июньышто нунылан лишыл Чавайнурышто эшеат ойыртемалтшын эрта.
Регион-влак кокласе конкурсыш ончычсо семынак регионлаште да республикысе ола ден районлаште ойыртемалтше-влак погынат. Нуно лудмаште да мурымаште таҥасаш тӱҥалыт. Лудмаште Валентин Колумбын поэзийже марла да вес йылмыла дене, Василий Крыловын произведенийже марла, тыгак автор-влакын шке возымышт йоҥгалтыт. Мурымаште палыме поэтна-влакын мутыштлан але шке возымо муро-влак шергылтыт.
Конкурсант-влак ийгот шот дене аклалтыт. Сеҥыше-влак кум степенян диплом, чолга участник-влак Почётан грамот, участник ден вуйлатыше-влак сертификат дене палемдалтыт.
Конкурсыш ушнаш шонышо-влак 23 июнь марте йодмашым metodmorki@yandex.ru электрон адрес дене колтышаш улыт.
Лудмаш жапыштак выставке ден мастер-класс-влак эртат, книгагудо площадке пашам ышта (тушто В.Колумбын книгаж гыч почеламутым йӱкын лудаш, тудын книгаж дене фотош войзалташ лиеш). С.Г.Чавайн лӱмеш сылнымут-этнографий комплексыште экскурсий эртаралтеш. Йоча площадке пашам ышта. Усталык коллектив ден эстраде мурызо-влакын концертышт лиеш. Ту жапыштак сеҥыше-влаклан наградым кучыкташ тӱҥалыт.
Ю.ИСАКОВ
