Марий Эл – библиотеке-влаклан книгам налмым эскерыме у системым тестироватлыме шотышто ончылно улшо ныл регион кокла гыч иктыже.
Россий кугыжаныш библиотеке Культур министерствын полшымыж дене «Субсидийын средствыж дене библиотек-влакым комплектоватлымым эскерыме системе» модульым ыштен.
Марий Эл вуйлатышын мутшо почеш, модуль бюджет средствам шинчалан койшын да пайдалын кучылташ йӧным ыштышаш. Лудшо-влаклан жаплан келшыше да чот кӱлешан изданийлам темлашышт библиотеке-шамычлан шке фондыштым пойдараш полшышаш.
«Республикыште библиотеке фонд эреак ешаралтеш. 2024 ийыште федеральный окса кӱшеш 7400 наре книгам налме», – палемден Юрий Зайцев.
Системе субсидийым налше библиотеке-влакын книгам налмыштым контрольышто кучаш, тыгак у литературын радамже ден содержанийже шотышто детальный стат отчётым ышташ полша.
Марий Элыште системым 27 январьыште тестироватлен пытареныт. Республикысе библиотеке-влак ончыланышт шындыме задачым сайын шуктеныт. Тыгай мониторинг системе РФ-н чыла регионыштыжо пашам ышташ тӱҥалеш.
Марий Эл Республикым вуйлатышын пресс-службыжын уверже негызеш Евгений Садовин ямдылен.
Фотом Марий Эл вуйлатышын пресс-службыч деч налме.
