Банкын у сынан офисше почылтын
Марий Эл правительстве председательын икымше алмаштышыже Дмитрий Троицкий да Промсвязьбанкын (ПСБ) председательже Петр Фрадков Йошкар-Олаште банкын у сынан отделенийжым почыныт.
Ешартыш офис кугу, изи да кокла кугытан бизнесын еҥже-влаклан вияҥашышт у йӧным пуа, регионын инвестицийым савырен кертмыжым кугемда.
Петр Фрадков палемден: банк республик вуйлатышын йӧным ыштымыж дене регионышто чолган вияҥ толеш. Тудо клиент-влаклан цифран у сервис ден технологийым веле огыл, тыгак обслуживатлыме у йӧным темла. У сынан офис энергийым перегыме технологийлан эҥерта да йӧнан улмыж дене ойыртемалтеш. У сынан тыгай офисше республикыштына икымше.
Марий Эл правительстве ПСБ-м кӱлешан партнёрлан шотла. Регион вуйлатыше Юрий Зайцев тудын дене кылым пеҥгыдемден толеш. Тыште у офисым почмаш республик вуйлатыше ден банк председательын кодшо ийын ноябрьыште кутырен келшымыштым илышыш пуртымо семын ончаш лиеш, палемден Дмитрий Троицкий.
ПСБ Российысе оборонно-промышленный комплексын тӱҥ банкшылан шотлалтеш да шкенжым ӱшанле кредитор семын ончыктен. А Марий Элыште ты комплексын 20 утла предприятийже пашам ышта. Регионысо правительстве нунылан инвестицийым савырашышт йӧным ыштымым кӱлешанлан шотла.
Банкын у офисше Первомайский уремысе 164-ше пӧртыштӧ верланен.
Петр Фрадков ден Дмитрий Троицкий «Полупроводник прибор завод» АО-што «Россий СоюзМаш» Марий отделенийын регионал советшын заседанийыштыже лийыныт.
Петр Фрадков тыгак Марий Элысе Куштылго атлетике федераций председатель Алексей Гребнев дене вашлийын, Нуно республикыштына куштылго атлетике дене инфраструктурым вияҥдыме шотышто пашам пырля ыштыме нерген каҥашеныт. Вет Петр Фрадков Россий куштылго атлетике федерацийын попечитель советшын председательжылан, РФ президент пелен Физкультур ден спортым вияҥдыме шотышто советын еҥжылан шотлалтеш.
Марий Эл вуйлатышын пресс-службыжын уверже негызеш Юрий ИСАКОВ ямдылен
