Российын тӱрлӧ кундемлаж гыч 89 ӱдыр-рвезылан Байконур космодром гыч «Союз-2.1а» ракете-носительым колтымым ончыктеныт. Нунын коклаште Марий Элын Звенигово районжо гыч «Икымше-влакын толкыныштын» чолга еҥже Константин Павлов (снимкыште) лийын.
Тудо космодромыш чумыргышо моло йоча-влак семынак «Икымше-влакын космический экспедицийышт» Россий кӱкшытан проектын кок этапшым эртен да сеҥыше-влакын радамышкышт лектын.
Ты кечын тӱнямбал космический станцийыш тыглай груз дене пырля посна капсулеш «Россий» тӱнямбал выставке-форумышто лийше икшыве-шамычын возымо эн кугу шонымашыштым колтеныт.
Байконурышто ӱдыр-рвезе-влаклан экскурсийым эртареныт, тыгак монтажым ыштыме да тергыме корпусым, «Протон» ден «Гагаринский старт» старт комплекслам, Космонавт-влакын аллейыштым, кумдан палыме конструктор Сергей Королёв ден икымше космонавт Юрий Гагаринын илыме пӧртыштым ончыктеныт.
Г.Кожевникова
Фотом Марий Эл Образований да науко министерствын сайтше гыч налме.
