Лӱдыкшыдымӧ сай качестван корно
Азап шагалемеш, но лыпланаш?..
«Лӱдыкшыдымӧ сай качестван корно» нацпроект – тиде у асфалт шартыш, тусо разметке да корно тӱрысӧ электротул волгалтарыш веле огыл, эше кудалыштме правилым пудыртымым фото-видео йӧн дене возен шогышо комплексат тушко пура.
Ты камер аварий лиедыме участке дене кылдалтше нелылыкымат кораҥдаш полша. Тудым шындыме деч вара тыгай верыште азап палынак шагалемеш але йӧршын пыта.
Но палемдаш кӱлеш: чумыр ДТП гыч 90-95 процентше автотранспорт лектын вочмо, весе дене тӱкнымӧ да йолешкым перен шуымо дене кылдалтын. Тугеже корнысо правил кузе водитель, тугак йолшке велым пудырталтеш. Сандене тудым шукташак кӱлеш.
Таче фото-видео йӧн дене возен шогышо системыш республик мучко 220 стационар камерым, тидын шотыштак федерал трассыште 37, регионал корнышто 77, а ола ден илемлаште 106 комплексым, ушымо. Нуно чыланат республикын балансыштыже улыт, сандене чыла штраф окса Марий Элын корно фондышкыжо пура, да тидын кӱшеш нацпроект почеш корно уэмдалтеш.
Нацпроектым шуктен толмо куд ий жапыште фото-видео йӧн дене возен шогышо камер республикыште 17 гыч 220 марте ешаралтын: 2019 ийыште 17 лийын, 2020 ийыште – 45, 2021 ийыште – 86, 2022 ийыште – 136, 2023 ийыште – 200, 2024 ийыште – 220.
Чыла камерым правил дене келшышын вераҥдыме. Тудым РФ Правительствын 2024 ий 1 июньысо 754-ше №-ан пунчалже дене пеҥгыдемдыме.
Юрий ИСАКОВ ямдылен
Фотом «Марийскавтодор» ГКУ деч налме
