Марий Элыште кум ияш марте ийготан йочан еш-влак кӱлешан арверым прокатыш налын кертыт.
Республикыштына кум ияш марте ийготан йоча-влакым ончаш кӱлшӧ арверым прокатыш пуымо пункт-влакым почыныт. Тыгай услуго «Еш» национальный проектын да регионыштына йоча шочмо чотым кугемдыме программын кышкарыштышт ышталтеш.
Шагал огыл еш коляске, кроватке, ходунок, пукшымо пӱкен гай шергакан арверым налын огеш керт. Адакше чыла тиде икмыняр жаплан веле кӱлеш, вет йоча кажне кечын кушкеш да вияҥеш. Тыгодым оксам аныклаш да йочалан кӱлешан арверым уто роскот деч посна налаш йӧным ыштыше прокат пунктлан эҥерташ лиеш.
Темлыме услуго дене ик эн ончыч Кужэҥер район гыч Станислав ден Дарья Соколовмыт пайдаланаш тӱҥалыныт. Самырык вате ден марий Ксения ӱдырыштлан видеоняньым прокатыш налыныт.
«Изи йоча-влакым ончаш кӱлшӧ арверым прокатыш пуымо пункт нерген Кужэҥер районысо калыкым социально обслуживатлыме комплексный рӱдерын специалистше деч пален нална. Самырык еш-шамычлан тыгай услугым ыштымылан моткоч куанышна. Ешыштына аза шочмо деч вара роскот палынак кугеме. Видеонянят – шергакан арвер. Ынде пелашемын сурт сомылкам шуктымыж жапыште ӱдырнам лач тудо онча. Устройствым йодын мийымына кечынак пуышт. Тиде мыланна моткоч кугу полыш», – палемда еш оза.
Мут толмашеш, кум ияш марте ийготан йочам ончаш кӱлшӧ арверым эреак Марий Элыште илыше ача-ава-влаклан (опекун, попечитель, икшывым эргылыкеш але ӱдырлыкеш налше, приёмный ача-ава-шамычлан) пуат. Тыгодым ача-ава кокла гыч иктыже 35 ий деч самырык лийшаш. Тыгай услуго дене студент ден кум шочшан еш, шкет ава але ача-влак пайдаланен кертыт.
Йочам ончаш кӱлмӧ арверлан шотлалтыт: кроватке, трансформер коляске, азам пӱтырымӧ (чиктыме) ӱстембал, пукшымо пӱкен, шезлонг, видеоняне, йӱштылтымӧ ваннычке да ходунок. Нуным налшашлан илыме верысе Калыкым социально осблуживатлыме комплексный рӱдерыш мийыман.
Маргарита Иванова
Марий Элын Паша да социальный аралымаш министерствыжын фотожо.
