ӰДЫРАМАШ КОРНО

Ава деч шерге еҥ тӱняштыжат уке!

Аван кечыже лӱмеш 28 ноябрьыште Кужэҥер районысо рӱдӧ книгагудышто верысе ӱдырамаш ушем ден тӱвыра пашаеҥ-влак «Есть женщины в наших селеньях» пайрем вашлиймашым эртареныт.

Тушко поселкышто да яллаште илыше ӱдырамаш-шамыч чумыргеныт. Нине ава-влакым саламлаш «Саскавий» марий ӱдырамаш ушемын еҥже-влакат миеныт. Погынышо-шамыч лӱмеш нуно ятыр поро мутым ойленыт. Тидын дене пырля кажныже, а тиде ушем вуйлатыше Людмила Кошкина, врач-влак Светлана Бочкарева, Маргарита Тойшева, ава ден икшыве кокласе кыл нерген, марий йылмым, йӱлам арален кодаш кӱлмӧ, тидым шуктымаште аван рольжо моткочак кугу улмо нерген ойленыт.

Погынышо-влак коклаштыже ойыртемалтше пӱрымашан ӱдырамаш-шамыч лийыныт. Нине туныктышо, эмлызе, кидмастар-влак, шуко ий ваш келшен илыше еш шке илыш-корнышт, айдемын илышыштыже да пӱрымаштыже аван рольжо нерген каласкаленыт.

«Саскавий» ушем Афган сарыште лийше ветеран-влакын да Десантник-влакын ушемлашт дене кылым куча. А вашлиймаште специальный военный операцийыште улшо-влакын аваштат лийыныт. Тидым шотыш налын, кок ушемжынат еҥже Игорь Тойшевым мероприятийыш ӱжыныт. Тудо Афган сарыште лийын да мо тиде тыгай улмым шкеже ужын, чытен, сеҥен лектын. Лӱддымылыкым ончыктымыжлан эсогыл «За отвагу» медаль дене палемдалтын. Кызыт – отставкыште майор. Сандене сарыште кредалме годым рвезе-влакын могай шижмашышт улмо, авашт дене вашкыл, нунын юмылан кумалмышт, уло чон дене вучымышт йӧсӧ жапыште вийым пуымо да илен лекташ, нелылык гоч эрташ полшымо нерген моткочак чонеш логалшын каласкален. Пытартышлан Игорь Викторович кызыт СВО-што улшо-влакын аваштлан шке эргыштлан тыгак полшаш тыланен да погынышо ӱдырамаш-влакым пайремышт дене саламлен.

Самырык ӱдырамаш-врач Алиса Владимировна Ельсукова коваж дене вашкылже, вашшижмашыже, икшывым ончен-куштымаште, еш йӱлам аралымаште тудын надырже ден рольжо могай улмо нерген ойлен. Адакшым кӱслем шокташ эше тунемеш веле гынат, погынышо-влакын кумылыштым сылне сем дене нӧлтен.

Поро мут ден тыланымаш деч посна республикысе марий ӱдырамаш-влакын «Саскавий» мер ушемыштын еҥже-влак Украиныште элна верч шогышо рвезе-влакын аваштлан шарнымаш пӧлекым да пеледышым кучыктеныт.

Тений – Педагог да наставникын идалыкше. «Саскавий-влак» тидымат шотыш налыныт да кужу жап туныктымо аланыште тыршыше ӱдырамаш-ава Нина Гавриловна Деревянныхым палемденыт. Книгагудыланат пӧлекым ямдыленыт – вуйлатышыже Надежда Бурмановалан икмыняр книга ден журналым кучыктеныт. А книгагудылан лач тидак ик эн кӱлешан огыл мо?

Тӱрлӧ сынан пӧлек деч посна «Саскавий» ушемын еҥже-влак мурпӧлек денат куандареныт. Тидым ышташ лӱмынак мурызо Лариса Сидоркина пырля миен.

Ушемын шкешотан йӱлаже уло: кажне тӱшка мероприятий мучаште погынышо-влак чылан пырля мурым йоҥгалтарат. Сандене ты ганат тиде йӱлам шуктеныт.

Пайремышке ушнышо-влакын палемдымышт почеш, кас моткочак поро шӱлыш ден эртен, вашлиймаш пайдале лийын.

Любовь Камалетдинова

Фотом «Саскавий» марий ӱдырамаш ушемын архивше гыч налме

Опубликовать в Одноклассники

Добавить комментарий