СВО-што улшо мемнан салтак-влаклан полшен шогышо волонтёр пашам Шернур районышто Снежана Богданова виктара. Тидын нерген Марий Элын Калык фронтын СМИ дене пашам ыштыше еҥже Ольга Кузьмина палдарен. Волонтёр пашажым тыште чолган ворандарен колтеныт. Вич районым – Кужэҥер, Параньга, Марий Турек, У Торъялым – авалтеныт.
Кугу паша Шернур посёлкысо Архангел Михаил лӱмеш черкыште кая. Тушто маскироватлыме сетке-влакым пидыт, окоп сортам велыт, салтак-влаклан госпитальлаш колташ вакшыш шарыме вургемым ургат, гуманитар полышым чумырат. Маскироватлыме сеткыжлан куэмым писын пӱчкедыше станокым верысе кидмастар Сергей Васильевич Иванов ыштен пуэн. Кызытеш 105 тыгай сеткым ямдыленыт. Пытартыш витлыжым ЛНР-ыш колтеныт.
Гуманитар полыш дене пырля СВО-што улшо салтак-влаклан Чумбылат курыкышто эртыше кумалтышыш намийыме солык ден шовычымат, аралтыш лийже манын, колтеныт. Шӱргым, кидым ӱшташыштат тиде кӱлеш.
Кодшо кечылаште Марий Элын Калык фронтшо калык деке соцкыл гоч йодмаш дене лектын ыле. Луганск воктене мемнан рвезе-шамыч обстрелыш логалыныт, ӱмбал вургемышт чыла йӱлен. Вургемым, носким кондышо поро еҥ-влак Йошкар-Олаштак пеш писын лектыныт.
Тыгак кызыт СВО-што у десант подразделенийым ыштат. Тушко ушнышо салтак-влаклан перчатке, чогыт, пуда, пила, кольмо, генератор да моло арверат кӱлыт. Кӧ полшен кертеш, Калык фронтын исполкомышкыжо тыгай адрес дене кондаш лиеш: Ленин проспект, 29-ше №-ан пӧрт, нылымше пачаш, 50-ше кабинет. Телефон номерже: 45-51- 70.
С.Носова
