Калыкын вуйшиймашыж-влак дене пашам ыштыме шотышто лидер ден аутсайдер-шамычым каласыме.
Марий Элым вуйлатышын пашажым жаплан шуктышо Юрий Зайцевын кӱштымыж почеш, Регионым виктарыме рӱдерын вуйлатышыже Виктор Трифонов исполнительный кучем орган-влакын мӧҥгешла кыл платформо да «Инцидент-менеджмент» системе гоч пурышо увер-шамычым обрабатыватлыме радамышт дене палдарен.
Рӱдерын пашаеҥже-шамыч акын методикыжым ямдыленыт. Тудо тоштемше увер-влакын уло-укешт, нунылан вашештыме кокла жап да качестве дене кылдалтын.
«Июньышто Образований да науко министерстве, Шернур ден Юрино район администраций-шамыч калыкын йодышыжлан жапым шуйкалыде гаяк вашештеныт. Тазалык аралтыш министерстве ден Йошкар-Ола администраций вараш кодын вашештымышт дене «ойыртемалтыныт», но тиде ситыдымаш палемдыме ведомствылашке поснак шуко еҥын йодыш дене лекмыж дене кылдалтын. Туге гынат вашмут шотышто вараш кодаш огеш лий», – манын В.Трифонов.
Тичмаш да сай вашмутым пуымо шот дене рейтингыште кӱшыл корнылам Кугыжаныш илыме надзор департамент ден «Марийскавтодор» ГКУ, Звенигово, Марий Турек, Морко да Юрино район администраций-шамыч айлат. Рейтингын чыла йодмашыж дене эн шуко баллым Кугыжаныш илыме надзор департамент ден «Марийскавтодор» ГКУ, тыгак Советский ден Марий Турек район администраций-влак погеныт.
Ю.Зайцев тиде статистике дене чылам палдараш, калык деч шуко йодыш пурымо, ведомство-влакын вашмутым вараш кодын пуымо амалым рашемдаш да ситыдымашым кораҥдаш, палемдыме уверым кучем орган вуйлатыше-влак деке намиен шукташ кӱштен.
Эртыше арнян «Инцидент-менеджмент» системыш 520 увер пурен. Калык эн шуко йодышым корным олмыктымо, кумдыкым тӱзатыме, шинчымаш, ЖКХ, социальный обслуживаний шотышто пуэн. Увер-влакын чотышт дене Юрино ден Медведево район-шамыч, Волжск, Йошкар-Ола да Козьмодемьянск ончыл верыште улыт.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
