«Герои Марий Эл. Талешке-влак»
«Ала, мыят пайдале лиям…»
25-29 июльышто Озаҥ олаште СВО-н участникше-влак коклаште икымше гана «Абилимпикс» чемпионат эртен.
Ик эн мастар-влак коклаште
Тушто Марий Элын чапшым кок ветеран арален: II степенян «За заслуги перед Отечеством» орденын медальже дене наградитлалтше Александр Николаев ден Мужество орден дене палемдалтше Павел Попов.
Павел «Резьба по дереву», а Александр «Слесарное дело» компетенцийыште мастарлыкыштым ончыктеныт. Таҥасымашын иктешлымашыже почеш, коктынат эн сай коклаш логалыныт.
Тыге шыжым нуно «Абилимпикс» чмпионатын финалыштыже выступатлат.
– Тиде таҥасымаш геройна-влакын пеҥгыдылыкышт, вий-куатышт дене кылдалтын. Тудо шке пашаштышт мастар улмыштым, элнам вияҥдымаште результатыш шумыштым ончыкта. «Абилимпиксыште» участвоватлымышт ойырен налме специальностьышт у кӱкшытыш шуаш полша, – манын Обороно министрын алмаштышыже, «Защитники Отечества» кугыжаныш фондын вуйлатышыже Анна Цивилева.
«Шуко боевой йолташым йомдарыме»
Павел Попов – «Герои Марий Эл. Талешке-влак» программын участникше. Тудо 76-шо номеран Псковысо дивизийыште служитлен.
– 2022 ий июньышто военкоматыш миенам. Псковыш каяш йодынам, вет салтак порысем тушто шуктенам. Спецоперацийыште мыйын фамилием гай эше кок боец пырля лийынна. Иктыже – Москва гыч хоккей дене высший лигыште модшо Дмитрий Попов. Лач тудо Кременнойышто, бой эртымеке, нелын сусыргымем годым икымше медицине полышым пуэн, мыйым минан пасу гоч нумал луктын. Чаманен каласыман, таче кечылан тудо уке. Задачым шуктымыж годым геройла колен. Мужество орденым Кременной кундемыште эртыше бойлан пуэныт. Тушко каяш шукышт тореш лийыныт, ме гына келшенна. Кривой Рог марте, тушко 45 километр лиеш, шуын огынал. Артиллерийын лӱйкалымашкыже логалынна. Пеш шуко боевой йолташым йомдарыме…
Армийыште служитлыме, ындыжым гражданкыште служитлыман, шкем терген ончыман, можыч, мыят пайдале лиям манын, «Герои Марий Эл. Талешке-влак» проектыш ушненам, – ойла Павел Попов.
Марий мланде шуко десантникым куштен
2 августышто ВДВ кечым палемдыме годым спецоперацийын ветеранже, ты войскаште службым эртыше Павел Поповат десантник-влакым, калыкым шокшын саламлен.
– Таче ме Юж-десант войскалан 95 ий теммым, десантник-шамычын кечыштым палемдена. Чыла десантник, ветеран-влаклан, нунын ешыштлан пеҥгыде тазалыкым тыланем, тӱҥалме пашашт вораныже. Тек тендан лӱддымылыкда, патырлыкда, элналан ӱшанле улмыда самырык тукымлан пример лиеш! – манын тудо. – «Мемнан деч моло нигӧ!» ӱжмаш – эн неле ситуацийыште ик эн ончылно улшо-влакын илыш-кредошт.
Мемнан республиклан тиде кече ойыртемалтше, вет Марий мланде шуко Геройым куштен. Нунын кокла гыч Псковысо десантник-влакын легендарный 6-шо ротым, Марк Евтюхиным палемдыман. Тудын корныжым специальный военный операцийыштат шуят.
