УВЕР ЙОГЫН

Ала чынжымак тыгай мут уло?

Йошкар-Оласе Комсомольский уремыште верланыше 122-шо №-ан пöртын пÿрымашыжым рÿдолаште илыше-шамыч веле огыл, ялысе-влакат сайын палат, очыни. Шке жапыштыже тыште «Молодёжный» кафе пашам ыштен. 90-ше ийлаште тиде оралтым уэмден олмыктеныт, да моло деч дизайн шотышто палынак ойыртемалтше зданийыште «Аяр» банк пеш талын пашам ышташ тÿҥалын. Но куатше шукылан ситен огыл – манмыла, пудештын. Тылеч вара оралте кужу жаплан тулыкеш кодын… Да, «Траст» национальный банк гай мойн организаций «илаш пуреныт», но шукылан огыл. Икманаш, оралте мотор, но пуйто аяран лийын…

Шукерте огыл тиде зданийыште «Ромбус» тазалык да моторлык рÿдер пашам ышташ тÿҥале. Пеш сай. Но таче тудын пашаж нерген огыл, а эсогыл пычкемыш жапыште электротул дене волгалтше вывескыж шотышто мутым лукнем. Рÿдерын могай профиль дене пашам ыштымыжым палдарыше руш йылме дене возымо вывеске шотышто нимат ом ойло – чыла чын, а теве марлаже мом серыме? «Тазанлык» манмыже мом ончыкта? Республикнан иктаж районыштыжо тыгай мутым кучылтыт мо? Умылем, «тазалык» мутым тыге куктыштыныт…

Чонемлан каньысырын чучат, «Ромбус» рÿдерыш йыҥгыртышым. Мыланем администратор вашештыш. Кö да кушеч улмем, молан йыҥгыртымем каласышым. «Марий йылме ден рÿдолам веле огыл, организацийдамат мыскынь семын ончыктеда» манын, рÿдерым вуйлатыше дене ушаш йодым. «Тудо уке», – вашештыш администратор. Алмаштышыж дене кутыралташ келшышым. Тудат уке! «Тидын шотышто кö дене мутланен кертам?», – йодым, но вашмутым шым кол. «Мый тыланда полшен сеҥем… Кумылда уло гын, йыҥгыртыза», – маньым да телефон номерем пуышым.

Тидын деч вара кум кече эртыш. «Ромбус» рÿдер гыч нигö ыш йыҥгырте…

Палем, Марий кундемысе амалкалче-влак организацийыштын лÿмыштым марла возыдеат кертыт. Но кумылышт лектын гын, тидым шот дене ышташ, тыгак кушто илымым да кöлан пашам ыштымым шотыш налаш кÿлеш, шонем. Кызыт организацийын руш лÿмжым марлашке кусарыме шотышто нимогай нелылык уке – кеч МарНИИ-ште, кеч МарГУ-што, кеч «Марий Эл» газет редакцийыште кумылын полшат.

А мыланем икте оҥай: йоҥылыш возымым палыме ÿмбач «Ромбус» рÿдер эше мыняр жап намысланаш тÿҥалеш?

                                                                                                                                                                                                       М.ИВАНОВА

                                                                                                                                                                                              Авторын фотожо     

Опубликовать в Одноклассники

Добавить комментарий