Тиде кечылаште марий рӱдолаштына Йошкар-Олан кечыжлан пӧлеклалтше «Марий калыкын легендыже-влак» пу гыч пӱчкеден лукмаш фестиваль эрта.
Тудым Сомбатхей микрорайонышто верланыше, шукерте огыл тӱзатен шындыме Марий паркыште торжественно почыныт. Каласен кодыман, паркым тӱзатыме пашаже эше шуйна, но тудын сынже чынжымак кызытат шинчам веле огыл куандара. А фестиваль тушто эртарыме икымше мероприятий лийын.
Пу гыч пӱчкедыше мастар-влак марий калыкыште акрет годсек лийыныт. Ончыкыжымат тыгак лийже манын, тыгай фестивальым эртараш темлымаш пурымеке, оласе мэрият, Марий Эл правительстват сайлан шотленыт. А темленже кызыт Сергиев Посад олаште илыше, Курыкымарий кундемын уста шочшыжо Владимир Алманов. Тудо профессиональный сӱретче, Йошкар-Олаште национальный президент школым, Богородский художественный техникумым, Моско кугыжаныш областной университетым тунем пытарен. Сӱретла веле огыл, изинек пу гыч пӱчкеда. Богородский техникумышто ты мастарлыклан шкежат 15 ий туныктен. Пытартыш жапыште тудо эше пу, ий гыч бензопила дене скульптурым пӱчкеда. Ятыр гана ты шотыштак тӱнямбал чемпионатлаште шкенжым терген, шуко гана сеҥышыш лектеден. Кузе тудын деч посна икымше тыгай фестиваль эрта ыле? Шкежат толын. Тудым жюриш пуртеныт.
Фестивальым почмаште саламлыме мутым Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов, Йошкар-Ола администраций вуйлатышын алмаштышыже Антон Пугачёв, оласе депутат-влак погынымаш вуйлатыше Виктор Кузнецов ойленыт. Пайрем кумылым марий эстрадын шӱдрыжӧ-влак З.Берникова, Н.Ковалевская, М.Почтенева, В.Албаев, М. Хорошева , «Ассорти», «Улыбка» куштышо ансамбль-влак нӧлтеныт.
Таклан огыл фестиваль марий калыкын легендыже-влаклан пӧлеклалтын. Конкурс арня иктешлалтмеке, нине скульптур-влакым Марий паркешак эрелан вераҥдат. Ончыч мастар-влак организатор-шамычлан эскизыштым колтеныт. А кызыт нуно шонымыштым илышыш шыҥдарат, ойырен налме образыштым пу гыч пӱчкедат. Конкурс гоч фестивальыш кандаш кидмастар ушнен. Нылытынже Марий Эл, молышт Мордовий, Чуваший, Удмуртий республикыла да Пенза ола гыч улыт. Фестиваль куд кече фестиваль шуйна. Кудымшо кечынже эн оҥайже лиеш, мастар-влак бензопила дене шагатат пеле жапыште метрат пеле кужытан пу сорым гыч скульптурым пӱчкеден ыштышаш улыт. Тиде усталыкше спидкарвинг маналтеш. Иктешлымашат туштак лиеш.
Фестиваль эртыме алан воктенысе сценыште кызыт кажне кас еда эше Йошкар-Олан лӱмгечыжлан пӧлеклалтше кумылаҥдыше программе каяш тӱҥалеш, марий артист-влак шке усталыкыштым ончыктат.
Светлана Носова
Снимкыште:фестивальыш ушнышо кидмастар-влак
М.Скобелевын фотожо
