Марий Эл Кугыжаныш Погынын 17 февральыште эртыше 24-ше сессийыштыже депутат-влак республик кÿкшытан 9 закон ден 17 пунчалым приниматленыт.
Парламент регионын Мер палатышкыже 11 у еҥым пеҥгыдемден. Нунын коклашке Марий Оньыжа Эдуард Александроват логалын. Тыгак икмыняр законыш вашталтышым пуртен. Поснак «Алкоголь, наркотик але токсинан моло вещества дене аҥыргыше еҥ-влаклан полышым пуымо мероприятий-шамычым организоватлыме да шуктымо нерген» законым палемдыман. Тидланже республикыштына специализироватлыме организаций-влакым почаш лийме. Тылеч вара нунын пашаштлан роскотын кугытшым да финансированийын источникшым рашемдат.
Депутат-влак аграрный туризм гай кÿлешан йодышымат каҥашеныт. «Ялозанлыклан кугыжаныш полыш нерген» законыш пуртымо вашталтыш ялысе туризмым вияҥдашлан кугыжаныш полышын у направленийже-влакым илышыш шыҥдарыме нерген ойла. Ял калыклан «Агротуризм» гай грант-шамыч дене полшаш палемдыме. Тылеч посна тыгай полышым налын кертше профессий радамым рашемдыме.
«Марий Эл Республикыште граждан-влакын обращенийлан правашкышт ешартыш гарантий-шамыч нерген» законымат тöрленыт. Документын у редакцийже дене келшышын, ынде должностьышто улшо еҥ-влак инвалид йочан ача-аваж ден опекунжым эн ончычак приниматлышаш улыт.
«Марий Эл Республикысе калык ден кумдыкым пÿртÿс да техногенный шотан чрезвычайный ситуаций деч аралыме нерген» законышкат икмыняр вашталтышым пуртымо. Ынде кугыжаныш ден верысе кучем орган, организций-влак ЧС режимыште аварий да утарыме пашам шуктымо нерген ончылгоч увертарышаш улыт. Чрезвычайный ситуацийым кораҥдашлан резервым ончылгоч ямдылаш кÿлеш.
Депутат-шамыч коллегышт Василий Речкиным йодмашыж негызеш полномочийже деч жап деч ончыч утареныт.
Эртыше ийын шуктымо паша нерген докладым Марий Элысе элкöргö паша министрын алмаштышыже-полиций начальник Алексей Коновалов, Кугыжаныш шотлымо палатын председательже Сергей Каргальский да Кугыжаныш Погынын председательже Анатолий Смирнов ыштеныт.
М.ИВАНОВА
