Специальный военный операцийыште улшо-влаклан еҥ-шамыч кӧ кузе кертыт, туге полшаш тыршат.
Мутлан, Параньга районышто Усола ялыште икмыняр ӱдырамаш, иквереш чумырген, сеткым пидыт. Тидым ышташ тӱҥалаш Галина Рублёва темлен.
– Мый Шернур район гыч ик чолга ӱдырамаш дене кылым шукертсек кучем да тудын дене мутланыме деч вара тиде шонымаш шочын, – каласкала чолга самырык ӱдырамаш. – Тыге ӱмаште июньышто эн ончыч ик йолташ ӱдырем дене пырля Шернурышто сеткым пидше-влак деке лӱмынак тидым ышташ тунемаш иктаж кум гана миен толна. Вараже пелашемлан сеткым пидаш лӱмын келыштарыме ик кугу стойкым ыштен пуаш йодым. Тудо йодмем шуктыш да беседкыш вераҥдыш. Тылеч вара ындежым ныл йолташ ватем, погынен, икымше гана сеткым пидаш тӱҥална. Тидланже когыньыштым ме Люда дене туныктышна. Тений кеҥеж моткоч шокшо ыле да южо кечынже 30 градусышто пӱжалт-пӱжалт пидынна. Ончычшо ты пашам кечыгут шуктенна гын, тидлан кӧра вараже эрдене да кастене гына пидаш тӱҥална. Материалым Шернур черке гыч кондена. А тудым, тыгак шӱртым, сеткым – икманаш, пидаш мо кӱлеш, чылажымат налаш оксам «с миру по нитке» манме семын поген налына.
Ойлымыж почеш, Параньга район Матародо школын туныктышыжо-влакат Галинамытын сеткым пидмышт нерген пален налыныт да нунат ты поро пашам шуктымашке ушнаш кумылым ончыктеныт.
– Мый кок кече коден пашам ыштенам гынат, ӱдырамаш-шамыч уке шеҥгечемат мемнан деке толыныт да беседкыште сеткым пидыныт. Тыгеат лиеден, – палемдыш Г.Рублева. Вара мутшым шуйыш: – Ик стойкышто нылытын-визытын веле пидаш лиеш. Шукынрак погынат гын, ваш-ваш мешаят веле. Сандене иктышт пидыныт, весышт материалым пӱчкеденыт, а кӧ гын тасмам пӱтырен, кӧлан мӧҥгышкыжӧ шуруповерт дене шпулько-шамычым пӱтыраш колтеденам.
Кылмыктымеке, ноябрьыште тиде стойкым пелашемлан беседке гыч пӧртыш пуртыктенам. Ынде шукыж годым сеткым шкетын пидам. Молан манаш гын южышт полшынешт гынат, пашам ыштымем годымжо тӱкылымӧ пӧртыш пураш аптыранат. Сандене жапше лийме семын кызыт утларакше поро пошкудем полшаш коштеш. Йӧн дене пайдаланен, тиде пашам шукташ полшымыштлан чылаштлан тауштем.
Шернур поселкыштат тыгаяк пашам шуктат. Сеткым пидше-влак кокла гыч ик чолга еҥже – райрӱдӧ гыч Надежда Бердинская (снимкыште пурла гыч кокымшо). Тудо тыге каласкалыш:
– Шернур районный книгагудо пелен СВО-шко колташ маскировочный сеткым пидме нерген ӱмаште колынам ыле да семынем шоналтышым: «А мый салтак-шамычлан мо дене полшен кертам? Мыят ты пашам шуктымашке кошташ тӱҥалам гын, изи гынат, надырем лиеш». Тыге нунын деке ушнаш кумылаҥым да июнь кыдалне ик кечын книгагудыш мийышым. Тусо пашаеҥ-шамыч мом кузе ышташ кӱлмым ончыктышт. Йӧршынат неле огыл улмаш. Тылеч вара южо кечынже тушто кечыгут шкетынат сеткым пидынам. Такшым еҥ-шамыч кӧ кузе кертеш, туге коштыт. Иктышт кечывал деч вара мият, весыштлан кечывал деч вара йӧнанрак. Тышке Йоча музыкальный школ, Калыкым социально аралыме рӱдер пашаеҥ-влак, книгагудо пелен чумырымо «Мы вместе» ӱдырамаш клубыш коштшо, тыгак пенсионер, тунемше-влак ушнат. Сетке ден тасмам поселкысо черке гыч кондат. Тушто «Юлавий» волонтер штаб ышта, сеткым пидше-влак группо уло. Ты жапыште мыняр сеткым пидынна, шотлымо огыл, вет пидын шуктымо семын вигак черкыш колтена.
Кызыт материална пытен да кок арня наре пидмашна уке. А кунам лиеш, тунам интернетысе соцкыл лаштыкыште увертарат да ме адакат погынен кошташ тӱҥалына.
Любовь Камалетдинова
Фотом интернетысе соцкыл лаштыкла гыч налме
