Налог ден моло оксам погымо деч шылмылан закон почеш мут кучаш шогалтен керыт мо?
С.Иванов.
Медведево район.
Шойбулак села.
Йодышлан Медведево районысо прокурорын полышкалышыже Л.Давлетшина вашештен:
— РФ-н уголовный законодательствыж дене келшышын, физический лица налог але моло оксам погымо деч шылеш гын, (а тидын шотышто тудо налог декларацийым пуышаш але моло документым ыштышаш) уголовно мут кучаш шогалтен кертыт. РФ-ын налог ден сбор шотышто законодательстве дене келшышын, гражданин налог декларацийым ыштен огыл але ыштен, но кугу окса але пеш кугу окса роскот шотышто шоя уверым пуэн гын, штрафым тӱлаш палемден кертыт. Тӱлаш ыштыме кугыт 100 тӱжем гыч 300 тӱжем теҥге марте але судитлыме еҥын ик ий гыч кок ий марте ыштен налме пашадарже кугыт лийын кертеш. Тыгак куд тылзе марте арестоватлен, але кум ий марте виеш пашам ыштыктен, але кум ий марте эрык деч посна коден кертыт.
Тӱлышаш кугу окса шотышто шоя уверым пуэн гын, тыгак 200 тӱжем гыч 500 тӱжем теҥге але судитлыме еҥын 18 тылзе гыч кум ий марте ыштен налме пашадарже кугыт марте тӱлаш ыштен, але кум ий марте виеш пашам ыштыктен, але кум ий марте эрык деч посна коден кертыт.
Ешартыш: кугу окса шотышто — кум ий жапыште кӱрылтде 900 тӱжем теҥге деч утлаш погынышо налог але сбор окса кугыт шотлалтеш. Тидын годым тӱлыдымӧ налог кугытшо тӱлышашлык налог да сбор ужашын лу процентше деч утларак але 2700 тӱжем тенге деч утларак лиеш. Поснак кугу оксажлан тыгак кум ий жапыште налог але сбор кугыт 4 миллион наре теҥгеш погынымым шотлат да тӱлыдымо налог кугытшо тӱлышашлык налог ужашын 20 процентше але 13500 тӱжем теҥге деч утларак лийшаш.
Налог ден сбор деч шылше еҥ икымше гана ты статья почеш титаклалтеш гын, тудым уголовно мут кучаш огыт шогалте. Но тидын годым мом тӱлышашыжым да эше палемдыме штрафым петырышаш.
С.Носова.
