Судьян действийжылан прокуратурыш вуйым шияш лиеш мо?
Н.Иванцов.
Йошкар-Ола.
Йодышлан вашмутым Медведево районысо прокурорын полышкалышыже С.Захарова вашештен:
— Огеш лий. РФ Конституцийын 120-шо статьяжын 1 ужашыштыже палемдыме почеш, судья независимый улеш да РФ Конституцийлан да федеральный законлан гына подчинятлалтеш. «РФ-ште судья-влакын статусышт нерген» закон почеш, судья, эсогыл тудын полномочийже пыта гынат, правосудийым шуктымыж годым шонымашыжым луктын ойлымылан да судын пунчалжым лукмылан мутым огеш кучо. Ончылгоч правосудный огыл приговорым, пунчалым але моло судебный актым лукмо дене кылдалтше шке пайдажлан преступно кучылтымыжлан судьян титакше пеҥгыдемдалтын да ты шотышто судын судын приговоржо вийыш пурен гын веле тыге лийын кертеш.
«РФ-се прокуратур нерген» федеральный закон дене келшышын, прокуратурын судебный органым тергаш полномочийже уке. Судья ӱмбаке судья-влакын коллегийшкышт вуйым шийман.
С.НОСОВА
